Mót­mæla við veitinga­staðinn Ítalíu vegna meints launaþjófnaðar

Þetta kemur fram í tilkynningu frá Eflingu. Þar segir að hátt í fjörutíu Eflingarfélagar hafi leitað til félagsins vegna aðskilinna kjarasamningsbrota og launaþjófnaðar á veitingahúsum í rekstri Elvars. 

Starfsmenn hafi verið hlunnfarnir varðandi launagreiðslur vegna dagvinnu, yfirvinnu og vinnu á rauðum dögum. Sömuleiðis séu dæmi um að starfsmenn hafi fengið greidd laun undir taxta. Iðulega hafi laun verið greidd of seint, aðeins að hluta eða alls ekki.

„Fyrrverandi starfsmenn veitingahúsa í rekstri Elvars Ingimarssonar, auk stjórnar og trúnaðarráðs Eflingar stéttarfélags og annarra Eflingarfélaga, munu í kvöld vekja athygli gesta veitingahússins Ítalíu á þessu framferði eiganda og rekstraraðila staðarins,“ segir í tilkynningunni. 

Það muni þau gera með því að taka upp mótmælastöðu fyrir framan veitingahúsið á Frakkastíg, dreifa þar dreifimiðum með upplýsingum um framferði rekstraraðilans og ræða við gesti.

Elstu mál nái tvö ár aftur í tímann

„Tugir mála eru til meðferðar hjá vinnuréttarsviði Eflingar á hendur félögum Elvars Ingimarssonar og sjö hafa verið send áfram til lögfræðiþjónustu. Elstu málin sem komið hafa inn á borð stéttarfélagsins eru frá því í ágúst 2022 og hafa Eflingarfélagar leitað til vinnuréttarsviðs fram á þennan dag vegna sambærilegra brota,“ segir einnig í tilkynningunni.

Þá segir að alla jafna séu ekki gerðir skriflegir ráðningarsamningar við fólk sem hefur störf á veitingahúsum sem Elvar Ingimarsson rekur. Þá fái starfsmenn sjaldan eða ekki afhenta launaseðla eða tímaskráningar.  

Ítrekuð vanskil hafi verið á greiðslum iðgjalda til stéttarfélagsins og dæmi séu um að ekki hafi verið staðin skil á staðgreiðslu af launum Eflingarfélaga, eða gengið hafi verið gegn óskum þeirra um nýtingu persónuafsláttar. Þannig hafi Eflingarfélaginn Erik Krištovčo setið uppi með ríflega hálfrar milljóna króna skattaskuld þegar hann lét af störfum á veitingastaðnum Il Antico vegna framgöngu atvinnurekendanna.

Viðurkenndi að launin hefðu ekki verið greidd

Vitalii Shybka starfaði á veitingahúsinu Ítalíu og lýsir því að hafa þurft að slá lán hjá vinum til að greiða leigu vegna þess að laun hans voru ekki greidd. 

„Þetta hafði allt mjög vond áhrif á líf mitt. Vegna þessara fjárhagsvandræða komu brestir í samband mitt við kærustu mína sem ollu því að endingu að sambandinu lauk. Ég fann ekki aðra vinnu um töluvert langan tíma sökum þess að ég varð þunglyndur og neyddist til að sækja mér aðstoð fagfólks,“ er haft eftir Vitalii í tilkynningu frá Eflingu.

Samstöðin fjallaði 18. maí um mál Salome Berelidze, sem áður starfaði á Ítalíu á Frakkarstíg, sem sakaði veitingastaðinn og móðurfélagið Opera Service ehf. um launaþjófnað.

Hún birti færslu í Facebook-hópnum „Vinna með litlum fyrirvara“ þar sem hún lýsti erfiðleikum sínum við að innheimta laun frá janúar, þegar hún byrjaði í hlutastarfi á staðnum. Hún sagðist ítrekað hafa óskað eftir launaseðlum en einungis fengið að sjá tímaskráningar á skjá og aldrei nein formleg gögn.

Hún hafi reynt að ræða við Elvar um launin en hann vísað henni áfram til endurskoðanda fyrirtækisins. Salome greindi frá því að eftir umfjöllun Samstöðvarinnar um málið hafi loksins fengið útborguð útistandandi laun.

Elvar viðurkenndi þá í samtali við Mannlíf að laun hefðu ekki verið greidd en það hafi verið vegna tæknilegra vandamála og aukins launakostnaðar.