Hekla Aurora skorin niður í minja­gripi

„Boeing 757-þotan lauk þjónustu sinni haustið 2025 en núna fær hluti af upprunalega skrokknum nýtt líf í takmörkuðu upplagi, hannað í samstarfi við Icelandair,“ segir í kynningu Aviationtag.

Hekla Aurora var þann 12. október í fyrra kvödd með sérstöku kveðjuflugi frá Reykjavíkurflugvelli. Um 140 flugnördar, þar af um 70 útlendingar, keyptu sér far með þotunni sem yfirflugfreyjan um borð sagði farþegum í hátalakerfi að væri fallegasta flugvél í heimi.

Þotan var rifin á Lleida–Alguaire flugvelli á Spáni en hann er um 150 kílómetra vestnorðvestan Barcelona. Starfsmenn Aviationtag voru þar júlímánuði í sumar að skera búta úr álskrokknum sem enn hélt norðurljósaútlitinu. Úr þeim hafa þeir unnið flugmerkispjöld sem hengja má á töskur eða nota sem lyklakippur.

Á heimasíðu Aviatontag segir að flugmerkin úr Heklu Aurora séu sem stendur uppseld. Framleiðslan haldi þó áfram og ný merki bætist við daglega. Það taki tíma að útbúa hvert merki. Verðið er frá 39,95 evrum stykkið, eða um 5.600 krónur íslenskar.

Flugvélin var upphaflega smíðuð fyrir spænska flugfélagið Iberia og flaug fyrst í apríl 1994. Icelandair eignaðist hana tíu árum síðar, árið 2004. Norðurljósaútlitið fékk hún þó ekki fyrr en árið 2014 en þá var hún endurmáluð hjá fyrirtæki í Norwich á Englandi.

Í lýsingu segir að málararnir hafi unnið út frá ljósmyndum og endurskapað norðurljósin á skrokknum með því að nota flókna tækni í málningasprautun. Þeir hafi verið listamenn og hafi parað vandlega saman flæðandi liti og bætt við íslensku vetrarlandslagi fyrir neðan. Grænir, tyrkisbláir, bláir og djúpir miðnæturtónar hafi blandast saman. Í farþegarýmið hafi verið sett sérsniðið LED-lýsingarkerfi með norðurljósaupplifun.

Hér má sjá kveðjuflugið frá Reykjavíkurflugvelli síðastliðið haust: