Deila um veru banda­rískra skipa í Hor­mússundi

„Fullyrðingu yfirmanns CENTCOM um að bandarísk skip hafi nálgast og siglt inn í Hormússund er harðlega neitað,“ hefur íranska ríkisfréttastofan Fars eftir talsmanni íranska hersins. Það sé undir herafla íranskra stjórnvalda komið hvort skip fari þar í gegn. 

BBC greinir frá þessu en fyrr í dag birti miðlæg stjórnstöð Bandaríkjahers (CENTCOM) færslu á samfélagsmiðlinum X, áður Twitter, þar sem fullyrt var að bandarískar hersveitir hefðu hafið „undirbúning að hreinsun tundurdufla í Hormússundi“ og að tvö skip „hefðu siglt um Hormússund ... sem hluti af víðtækara verkefni sem er ætlað að tryggja að sundið sé alveg laust við tundurdufl.“

Fundi fram á nótt

Þríhliða viðræður fulltrúa Írans, Bandaríkjanna og Pakistans hófust í Islamabad í dag og hefur BBC heimildir fyrir því að þær muni ná fram yfir miðnætti að staðartíma.

Donald Trump Bandaríkjaforseti fullyrti í samfélagsmiðlafærslu á Truth Social fyrr í dag að Hormússund yrði brátt opið fyrir skipaumferð á ný. Þá ítrekaði hann að tóm olíuskip væru á leið til Bandaríkjanna til að „hlaða.“

Forsetinn segist hafa samþykkt að hætta spengjuárásum á Íran með því skilyrði að stjórnvöld í Teheran, höfuðborg Írans, opni Hormússund á ný. 

Um er að ræða eina fjölförnustu olíuflutningaleið heims og fer um 20 prósent af olíu og fljótandi jarðgasi um sundið í venjulegu árferði. Vegna þessa hefur lokun sundsins haft mikil áhrif á olíuverð og heimshagkerfið en einnig fer stór hluti lykilefna í áburðarframleiðslu um Hormússund. Siglingarleiðin hefur verið meira og minna lokuð síðan Bandaríkin og Ísrael hófu árásir á Íran 28. febrúar.

Útlit var fyrir að samkomulag hafi náðst um að opna sundið á þriðjudag en daginn eftir fóru írönsk stjórnvöld fram á Ísraelsher myndi stöðva hernað sinn í Líbanon eftir mannskæðar árásir þar í landi. Síðan þá hefur tvennum sögum farið af því hvort vopnahlé í Líbanon hafi verið hluti af viðræðum Bandaríkjanna og Íran en Ísrael hefur sagt það afdráttarlaust að þær hafi ekki áhrif á árásir þeirra á Hezbollah í Líbanon.  

Fréttin er í vinnslu og verður uppfærð.