Góður hárblástur og smink á morgnana á undan­haldi

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

Í mörg ár vaknaði ég fyrir klukkan sex á morgnana til að kenna leikfimi og er í dag með mótþróaröskun við að stilla klukkuna svo snemma. 

Ég reyni að hámarka nýtingu á öllum tíma og þar með talið svefntíma og fer helst ekki á fætur fyrr en upp úr hálfátta.“

Hvað er það fyrsta sem þú gerir á morgnana?

„Ég á lítinn fjögurra ára strák sem sér til þess að fjörið byrjar strax og við vöknum, helst með ofurhetju spurningaleik. Í ljósi þess hversu lengi við erum að koma okkur á fætur þá förum við frekar rösklega út í daginn og unglingarnir mjög sjálfbjarga.

Helst vil ég ná að kveikja á kerti á morgnana áður en ég opna augun og næ stundum kaffibolla áður en við höldum á leikskólann. Það verður að viðurkennast að góður hárblástur og sómasamlegt smink á morgnana er á miklu undanhaldi.“

Hvaða jólasvein samsvarar þú þig best við? 

„Ætli það sé ekki kertasníkir í ljósi þess að ég vil hafa kertaljós við öll tilefni og skil þann jólasvein því best. Veit ekki hvort hann sé sammála mér að kerti séu líka mikilvæg yfir sumartímann.“

Í hvaða verkefni ertu að vinna helst í þessa dagana?

„Fyrir rúmum tveimur mánuðum tók ég við nýju starfi hjá Lyf og heilsu og er í miðri stefnumótun með teyminu. Það er gaman að móta framtíðina í rótgrónu fyrirtæki og fá að vinna að nýjum hugmyndum. Ég er ennþá að meta hvort hugmyndirnar sem koma um miðja nótt sé góðar eða slæmar, ætli það verði ekki að koma í ljós.

Síðan er ég búin að heimsækja nær allar starfsstöðvarnar okkar sem eru 30 talsins og stundum fær sonur minn að fljóta með sem heldur að starfstitill minn sé plástrastjóri, sem er svosem nærri lagi.

Mér finnst skemmtilegast við starfið að kynnast fólkinu sem keyrir áfram starfsemina í apótekunum og þekkir viðskiptavinina best. Þau hafa mjög miklu að miðla og ég er að læra hratt af þeim. Þessu er ágætlega lýst eins og að drekka vatn úr brunahana fyrstu vikurnar í starfi.

Önnur stórverkefni þessi misserin snúa að smákökubakstri á aðventunni sem eru sérstakar gæðastundir á heimilinu.“

Hvernig skipuleggur þú þig í vinnu?

„Ég legg mikið upp úr skilvirkni og vil nýta tímann mjög vel. Dagbókin er því vel þétt og ég byrja vikuna alltaf á því að skoða hvernig vikan og verkefnin líta út. Reyni þá líka að passa að það sé tími fyrir hreyfingu og hittinga með góðum vinum. 

Mér finnst fylgja því mjög góð tilfinning að haka við lista af hlutum sem þarf að klára í vinnu og er því nær alltaf með „to do“ listann uppi við.

Seinnipartarnir eru oftast nær fjölskyldutími en ég nýti kvöldin oft í sófanum með tölvuna að sópa upp tölvupóstum og grúska í excel skjölum. 

Þá er líka gott að nýta kyrrðina í hugmyndavinnu.

Hvenær ferðu að sofa á kvöldin? 

Ég er oftast ekki farin að sofa fyrr en upp úr miðnætti og myndi óska mér að kvöldin væru lengri því þau eru svo skemmtileg. Þá gefst tími í samveru með stóru börnunum, misgott sjónvarpsefni eða spila Catan við fjölskyldumeðlimi. 

Virku kvöldin eru líka oft notuð í vinnu eða útihlaup en mér finnst einstaklega gott að hlaupa í myrkrinu með góða tónlist í lok dags. Á sumrin er hlaupunum skipt út fyrir golf og þá seinkar svefntímanum enn frekar.