Leigja frekar en að kaupa: „Ég þarf ekki að eiga allt“

Enda allir í janúarátaki!

Heimform leigir fólki líkamsræktartæki í áskrift en það er rekið af sömu aðilum og þeim sem reka Rent a Tent, Rent a Party, Mini Rent og ferdataska.is.

Allt útleigueiningar þar sem hugsunin er:

Að leigja frekar en að kaupa.

Að deila frekar en að vannýta.

Ég held að leigumarkaðurinn muni vaxa mikið í framtíðinni vegna þess að þótt fólk vilji eignast fasteignirnar sínar eða bíla, þá er almennt viðhorf í dag orðið ríkjandi: 

Ég þarf ekki að eiga allt.“

Ferðatöskur eru loft

Eins og flestir fyrirtækjaeigendur þekkja er EHF oft sagt standa fyrir skammstöfuninni „ekkert helvítis frí.“ Enda kann Gunnar alveg að tala um rekstur á mannamáli. Sem flestir sem í rekstri eru vita að er oft mikið hark.

Þar sem útsjónarsemi skiptir miklu máli. En líka hugrekkið til að prófa sig áfram.

Þegar Atvinnulífið heyrði í Gunnari síðast, byrjaði viðtalið á þessum orðum:

Um land allt standa þúsundir fyrirtækjaeigenda frammi fyrir einni spurningu á hverjum degi: 

Hvernig náum við að lifa heimsfaraldurinn af?

Rent a Party lifði þó af sem betur fer. Og hefur meira að segja bætt við sig síðan því þegar mest er, starfa þar 12-14 manns. 

Frá árinu 2021 hafa útleigueiningar bæst við: Mini Rent varð til fyrir ýmsar barnavörur, útleigan ferdataska.is sem skýrir sig svo sem sjálf og síðast Heimaform þar sem fólk leigir líkamsræktartæki heim til sín í áskrift.

Allt leigueiningar sem Gunnar segir í raun mega rekja til Rent a Tent.

„Sá sem er meirihlutaeigandinn okkar í dag stofnaði Rent a Tent árið 2012 en í dag erum við fimm sem eigum þetta,“ útskýrir Gunnar; hópur sem fæddur er tímabilið 1989-1998 og telst því til kynslóðarinnar sem kynnti deilihagkerfið til sögunnar.

„Flestar hugmyndirnar okkar hafa líka orðið til vegna þess að við höfum verið að upplifa þörf á þjónustunni sjálf,“ segir Gunnar.

„Við erum til dæmis öll að eignast börn og höfum öll verið í ræktinni í gegnum árin eða í íþróttum. Það hvernig maður getur ráðstafað tímanum sínum breytist hins vegar þegar maður eignast barn,“ segir Gunnar og bætir við:

„Þegar ég er búin að svæfa er ekkert endilega jafn sjálfsagt og áður að ég taki mér tíma í að keyra á líkamsræktarstöð, finni þar stæði, fari í ræktina og komi síðan heim. Allt tekur þetta tíma sem er mun lengri en tíminn sem fer í það að ég hoppi á brettið heima í stofu á kvöldin og horfi á sjónvarpið á meðan.“

Gunnar segir tíðarandann þó ekki aðeins þann að fólk vilji í meira mæli borga fyrir vörur á meðan þær eru í notkun, heldur teljist fleira til.

„Ferðatöskur eru gott dæmi. Því þetta eru vörur sem við notum sjaldan en taka mikið pláss í geymslunni, eru þó meira og minna bara loft,“ segir Gunnar og hlær.

En bætir síðan við:

Fermetraverð á húsnæði er dýrt og í dag eru ekki allir tilbúnir til að greiða fyrir dýra fermetra á geymslu fyrir dót sem fólk er ekki að nota.“

Minna stress

Gunnar segir alls kyns skýringar vera á því hvers vegna oft henti betur að leigja en að kaupa.

„Það er til dæmis mikið um að fólk leigi sér líkamsræktartæki heim á meðan það er í fæðingarorlofi eða amma og afi leigi barnakerrur því barnabörnin eru að koma í heimsókn frá útlöndum.“

Stundum þjóni leigan líka öðrum og stærri markmiðum.

„Líkamsræktartækin heima henta til dæmis oft fólki sem er nýbúið í liðaskiptaaðgerð eða mjaðmaaðgerðum þar sem læknir er síðan að mæla með ákveðnum æfingum í kjölfar aðgerða. Sem sumum finnst þá auðveldara að reyna að stunda heima hjá sér þegar því hentar frekar en að fara á líkamsræktarstöð.“

Hlauparar séu að leigja bretti til að geta hlaupið oftar og meira.

„Ég til dæmis ætlaði að fara út að hlaupa um daginn, en það var glerhált og þótt maður sé á broddum leist mér ekkert á blikuna. Bretti inni í stofu leysir úr þessu.“

Enn eitt atriðið er líka vert að nefna.

Við vitum síðan að það er ákveðinn hópur sem einfaldlega veigrar sér við því að fara í líkamsrækt því fólki finnst stressandi að mæta á staði þar sem allir virðast klæddir nýjustu íþróttafötunum, merkjaflíkum og tísku sem fólki líður misjafnlega með.“

Samnýtingin segir Gunnar líka góða.

„Við erum komin með fína reynslu af þessu konsepti sem útleiga byggir á. Með því að fjárfesta í fleiri útleigueiningum, eins og líkamsræktartækjunum, erum við samt enn að byggja á því sem við kunnum að gera og samnýtum um leið verkferla, tölvukerfi, vöruhús og fleira,“ segir Gunnar og bætir við:

„Ég held nefnilega að hjá flestum fyrirtækjum gangi hlutirnir svona fyrir sig; menn eru ánægðir með þau störf sem fyrirtækin eru að skapa og að reksturinn geti greitt sínu fólki laun. Allt umfram það fer síðan í að fjárfesta í einhverju til að bæta við eða efla reksturinn sjálfan.“

Svigrúm til fjárfestinga skapaðist hjá þeim fyrir rúmu ári síðan. Þegar ráðist var í að kaupa líkamsræktartæki en heimasíða Heimaform fór í loftið á gamlársdag 2024.

„Allan janúar í fyrra vann hópurinn dag og nótt við að setja tæki saman og keyra heim til fólks og auðvitað er sagan að endurtaka sig núna í janúar. Enda keyrðum við um þrjátíu líkamsræktartæki út fyrsta sólahring þessa árs!“ segir Gunnar og skellihlær.

Gunnar segir Heimaform þó líka hluta af heildarsamnýtingunni.

„Því það er gott að bæta við einingum á konsepti sem við þekkjum nú þegar vel til en vinnur vel með öðru. Til dæmis er rólegt hjá Rent a Party núna fram að þorrablótum og Rent a Tent törnin er í sumar,“ segir Gunnar en bætir við:

Viðhorfið fyrir allar útleigurnar okkar er samt í raun það sama, því annaðhvort ertu að nota dótið þitt eða ekki og ef ekki er gott að geta skilað þeim. 

Það vill enginn lengur eiga þrekhjól sem í raun endar bara sem fataslá inni í herbergi.“