Heilbrigðiseftirlitið varaði við breytingunum

Eins og fram hefur komið í fréttum síðustu vikuna hefur reglugerð sem sett var af síðustu ríkisstjórn leikið veitingamenn grátt, sem og og aðra fyrirtækjaeigendur. Reglugerðin, sem var sett af Guðlaugi Þór Þórðarsyni þegar hann var umhverfisráðherra í síðustu ríkisstjórn, kveður á um fjögurra vikna auglýsinga- og umsagnarskyldu.

Þetta hefur meðal annars gert það að verkum að alþjóðlega veitingakeðjan Starbucks frestaði opnun sinni fram í lok sumars, í stað þesss að opna samkvæmt áætlun í maí.

Heilbrigðiseftirlitsstofnanir mótmæltu breytingunum á sínum tíma. Heilbrigðiseftirlit Reykjavíkur taldi breytingarnar valda „óþarfa flækjustigi“ og taldi „enga ástæðu“ fyrir því að auglýsa starfsleyfi samkvæmt hollustuháttareglugerð enda ættu þau öll að standast kröfur reglugerðarinnar sem og kröfur í gildandi skipulagi og hafa samþykkar teikningar hjá byggingarfulltrúa. 

„Svona krafa er mjög íþyngjandi fyrir atvinnulífið auk þess sem flækjustig eykst talsvert,“ sagði í umsögn Heilbrigðiseftirlits Reykjavíkur. 

Samtök heilbrigðiseftirlitssvæða á Íslandi bentu á í sinni umsögn að reglugerðin myndi „óumdeilanlega gera leyfisveitingu bæði flóknari og mun kostnaðarsamari.“

Fjögurra vikna reglan heyrir sögunni til

Er þetta ekki til marks um það að þessar breytingar hafi verið mistök?

„Jú, ég held að það hafi almennt verið of langt gengið í að flækja hlutina og setja svona óþarfar og ómálefnalegar kröfur og íþyngjandi kröfur á atvinnulífið á síðustu árum,“ svarar Jóhann Páll Jóhannsson, umhverfis-, orku- og loftslagsmálaráðherra, í samtali við fréttastofu.

Í samráðsgátt liggja nú drög að breytingum á reglugerðinni sem eiga að aflétta starfsleyfisskyldu á 23 tegundum atvinnustarfsemi, þar á meðal veitingahúsa, og þess í stað gera starfsemina skráningarskylda. Jóhann Páll gerir ráð fyrir því að reglugerðin verði sett í gildi í vikunni þar sem umsagnarfresti í samráðsgátt lýkur á morgun.

„Og það þýðir þá að þessi fjögurra vikna auglýsinga- og umsagnartími mun heita sögunni til,“ segir Jóhann Páll enn fremur. 

Aðeins ein umsögn hefur borist og barst hún frá Samtökum fyrirtækja í ferðaþjónustu, sem fagna breytingunum.

„Þannig erum við að eyða óþarfa biðtíma og það ætti þá líka að draga úr kostnaði sem fellur til þegar veitingastaður er tilbúinn fyrir rekstur en getur ekki opnað og þarf að greiða laun og verður af tekjum af því að menn eru að bíða eftir því að auglýsingafresti vegna starfsleyfis ljúki,“ segir ráðherra. 

„Mér finnst það algjörlega óþolandi staða.“