Sam­gönguinn­viðir hafi ekki verið byggðir upp á sama hraða og flug­stöðin

Umhverfis- og samgöngunefnd Alþingis kom saman til sérstaks aukafundar í morgun þar sem staðan á Reykjanesbrautinni og Keflavíkurflugvelli fyrr í vikunni var rædd. Vilhjálmur Árnason, formaður nefndarinnar, segir nefndarmenn hafa verið sammála innviðaráðherra um að þörf væri á aðgerðum. 

„Nú er lagt allt kapp á það í þeim starfshópi sem að ráðherra er nú þegar búinn að skipa, að komast til botns í því hvað það var nákvæmlega sem kom upp á og hvað er það sem við getum bætt til þess að koma í veg fyrir það að þetta komi upp aftur. Þetta er náttúrulega töluvert tjón og óhagræði en þetta er líka bara mikið öryggismál,“ segir Vilhjálmur.

Ljóst sé að bæta þurfi viðbrögð og undirbúning en Vilhjálmur spyr einnig hvort samgönguinnviðir hafi orðið eftir samanborið við uppbyggingu á flugstöðinni. 

„Við erum að byggja gríðarlega mikið upp og auka umsvif flugstöðvarinnar fyrir tugi milljarða en á meðan klárum við ekki þennan eina samgönguinnvið sem að liggur að henni,“ segir hann.

Stóri flöskuhálsinn hafi verið vegarkaflinn þar sem Reykjanesbær og flugstöðin mætast á Reykjanesbrautinni. Hefði svo ekki verið hefði líklegast verið hægt að opna veginn fyrr, þó Vilhjálmur vilji ekkert fullyrða um hvort hægt hafi verið að koma í veg fyrir að Reykjanesbraut hefði verið lokað. 

„Þarna þarf einhvern veginn að samræma betur, bæði að klára þessa uppbyggingu og auka svo þjónustuna og snjómoksturinn og viðbragðið til þess að þetta verði ekki flöskuháls komi svona veðuraðstæður upp aftur,“ segir Vilhjálmur.

Líta megi til veghaldara annars staðar

Starfshópur innviðaráðherra mun skila tillögum innan mánuðar en honum er meðal annars falið að semja drög að áætlun til að takast á við aðstæður líkt og þær sem sköpuðust í vikunni. Að sögn Vilhjálms þarf að skýra hvernig betur er hægt að standa að undirbúningi, hver eigi að taka ákvarðanir og hver eigi að upplýsa. 

„Það kom líka fram að það voru tæki frá Isavia sem að komu þarna út í lokinn og sáu til þess að það væri hægt að opna Reykjanesbrautina. Þannig ég held að þetta snúist svolítið bara um það að sá búnaður sé þá til taks og það sé skýrt hver tekur ákvörðun um að senda hann af stað til þess að halda veginum opnum eins og veður leyfir næst þegar svona kemur upp á,“ segir Vilhjálmur.

Hann bendir á að mögulega sé hægt að læra af því hvernig farið er að málunum annars staðar á landinu. 

„Þegar við erum komin með svona fjölfarinn og mikilvægan samgönguinnvið þá þarf kannski bara að vera aukin vöktun og eftirlit af veghaldara a veginum, eins og við sjáum til dæmis bara í göngum sem eru með myndavélaeftirlit allan sólarhringinn og tilbúna dráttarbíla,“segir Vilhjálmur en þekkingin sem verður aflað mun einnig nýtast á öðrum stofnæðum. 

„Það voru allir algjörlega sammála um það að það þyrfti að bregðast við og það væri mikið öryggismál að þetta kæmi ekki fyrir aftur. Þetta er þjóðaröryggismál og líka bara öryggismál fyrir þá sem eru hér á ferðinni,“ segir hann enn fremur.