Virkum smitum fækkað um 400 á tíu dögum

Staðfest smit nýs afbrigðis kórónuveiru sem veldur Covid-19-sjúkdómnum eru nú alls 1.727 hér á landi. Staðfestum smitum fjölgaði um 7 frá því að síðustu tölur birtust á covid.is klukkan eitt í gær en þá var greint frá 1720 nýju smiti. Virk smit eru nú 642 talsins og hefur fækkað um 400 síðastliðna 10 daga.

Þá eru 36 nú á sjúkrahúsi og átta á gjörgæslu vegna Covid-19. Alls hefur 1077 manns batnað af veikinni. Þá er 2.101 einstaklingur í sóttkví og 642 í einangrun. 16.726 manns hafa lokið sóttkví. Sýni hafa verið tekin úr 37.386 manns. Alls hafa átta látist af völdum sjúkdómsins hér á landi.

Klukkan tvö verður haldinn upplýsingafundur almannavarna og landlæknis þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.

Víðir Reynisson yfirlögregluþjónn, Þórólfur Guðnason sóttvarnalæknir og Alma Möller landlæknir verða á staðnum til að upplýsa landsmenn um þróun mála með tilliti til kórónuveirunnar hér á landi. Þá verður Kári Stefánsson forstjóri Íslenskrar erfðagreiningar gestur fundarins, sem verður í beinni útsendingu hér á Vísi og Stöð 2 Vísi í kerfum Vodafone og Símans.