Hækka hús á Vonarstræti

Íslandshótel hafa fengið heimild borgaryfirvalda til að auglýsa deiliskipulagsbreytingu um hækkun á Vonarstræti 4 og sex nýja kvisti á þakhæðinni.

Vonarstræti 4, sem byggt var á 1925 og 1926 eftir teikningu Guðjóns Samúelssonar á að tengjast nýrri byggingu Íslandshótela í Lækjargötu 12. Í umsögn Minjastofnunar segir að vel komi til greina að hækka mænishæðina enda sé húsið lágreist í samanburði við önnur verk Guðjóns.

„Stærð og útfærsla kvistanna virðist sannfærandi á teikningu. Þeir draga úr sýnileika þakhækkunar án þess þó að bera húsið ofurliði,“ segir Minjastofnun. Með breytingunni bætast við fjögur hótelherbergi. Frestur til að gera athugasemdir er til 9. apríl.