Sú belgíska lék ljótan leik en Víðir valdi Putellas og Rodri

Víðir Sigurðsson, höfundur bókanna Íslensk knattspyrna og íþróttafréttamaður með margra áratuga reynslu, var í hópi þeirra hundrað blaðamanna sem kusu um það hver hlyti Gullbolta karla líkt og síðustu ár. 

Víðir var sömuleiðis í hópi þeirra blaðamanna sem tóku þátt í kjörinu kvennamegin en France Football velur fulltrúa frá hundrað hæst skráðu þjóðunum karlamegin og fimmtíu hæst skráðu þjóðunum kvennamegin.

Í kjörinu hjá konunum valdi Víðir Alexiu Putellas í efsta sæti og Ewu Pajor í annað sæti en þær tvær urðu langefstar í kjörinu og vann Putellas afgerandi sigur.

Það voru þó ekki allir blaðamennirnir sem kusu Putellas í efsta sæti og er einn atkvæðaseðillinn sérstaklega vafasamur. 

Belgíska blaðakonan Christine Schréder valdi nefnilega samlöndu sína, belgísku landsliðskonuna Tessu Wullaert, í efsta sætið. Enginn annar blaðamaður gaf hinni 33 ára gömlu Wullaert atkvæði því enda þótt hún hafi rofið hundrað marka múrinn fyrir belgíska landsliðið á þessu ári, undir stjórn Elísabetar Gunnarsdóttur, þá fer því fjarri að hún sé sú fótboltakona í heiminum sem skarað hefur fram úr á þessu ári.

Fimmtán stig fást fyrir efsta sæti á atkvæðaseðli og því dugði atkvæðaseðill belgísku blaðakonunnar til þess að Wullaert varð í 19. sæti í kjörinu um Gullboltann.

Rodri, Mbappé og Messi fyrir ofan Kane

Karlamegin var Víðir með sigurvegarann, Harry Kane, aðeins í 4. sæti en Rodri, lykilmaður í heimsmeistaratitli Spánverja í sumar, fékk efsta sætið á atkvæðaseðli Víðis. 

Miðvörðurinn ungi Pau Cubarsí sem einnig átti svo stóran þátt í heimsmeistaratitlinum var sá eini á lista Víðis sem ekki endaði í hópi tíu efstu í heildarkjörinu.