Icelandair geti ekki svarað fyrir orð­ræðuna

Bogi Nils Bogason, forstjóri Icelandair, var til tals í myndveri í kvöldfréttum Sýnar í dag þar sem gjaldþrot lággjaldaflugfélagsins Play var í brennidepli.

Miðaverð í ýmis flug hjá Icelandair hefur farið hækkandi í dag í framhaldi af fregnum af gjaldþrotinu en flugfélög notast gjarnan við breytilegt verðlag í samræmi við eftirspurn.

Er það algjört lögmál að síðustu sætin þurfi að kosta þrefalt meira, sérstaklega í svona ástandi?

Bogi svarar að Icelandair sé í víðfeðmum rekstri og selji yfir tíu þúsund miða á degi hverjum á ýmsum vefsíðum, til að mynda í gegnum önnur flugfélög. „Það er mjög erfitt fyrir okkur að grípa inn í og fara að stýra því hverjir geta keypt þessa síðustu miða í ákveðin flug,“ bætir Bogi við sem bætir við að síðustu sætin séu ávallt dýrari. 

„Það er engin leið fyrir okkur að stýra því hver geti keypt þessa miða. Ef við færum að lækka þetta gæti einhver í Bandaríkjunum alveg eins komið og keypt þetta.“

Flugmaður Icelandair sem spáði fyrir hrapinu

Forstjóri Play hefur í dag vísað til óvæginnar umræðu í aðdraganda gjaldþrotsins, sem hafi orðið Play að falli.

Skömmu eftir að félagið tryggði sé aukafjármagn til að halda rekstri sínum áfram mætti Jón Þór Þorvaldsson, formaður félags atvinnuflugmanna og starfsmaður Icelandair, í viðtal á Bylgjunni þar sem hann fullyrti að Play væri í þann mund að fara í gjaldþrot.

Finnið þið til ábyrgðar á þessari umræðu og hvernig stendur á því að það sé þörf ykkar starfsmanna að koma í fjölmiðla til að segja sérstaklega þessar fréttir?

„Ég þekki ekki þá þörf. Þessi aðili sem þú ert að nefna er formaður félags atvinnuflugmanna og talar í því umboði þarna,“ svarar Bogi sem kveðst þannig ekki getað tjáð sig um ummælin.

En hvað finnst þér um þau?

„Við höfum alltaf sagt að við berum virðingu fyrir samkeppninni og viljum hafa samkeppni í okkar umhverfi. Og hér eftir sem hingað til verður mikil samkeppni í okkar umhverfi, það eru tuttugu flugfélög að fljúga hingað og við fögnum samkeppninni.

Play kvartaði til SKE

Play sendi kvörtun til Samkeppniseftirlitsins þann 5. september síðastliðinn vegna þessa og sakaði Icelandair um misnotkun á markaðsráðandi stöðu. Icelandair fékk þá kvörtun á sitt borð, að sögn Boga, sem ítrekar þó að starfsmaðurinn hafi mætt í viðtal á vegum ÍFF en ekki Icelandair.

„Þetta er engan veginn gert í samstarfi við Icelandair eða okkur, þessi ummæli sem hann kom fram með. Þannig að ég veit ekki alveg hver staðan er á svari okkar til Samkeppniseftirlitsins.“

Njóti ekki verndar hjá ríkinu

Nú eruð þið risin á markaðnum. Þið njótið ákveðinnar verndar hjá ríkinu. Allir ríkisstarfsmenn fljúga hjá Icelandair út af vildarpunktum. Það hefur verið rætt um þetta margoft. Þið eruð rótgróið flugfyrirtæki hér á landi. Ættuð þið að styðja betur samkeppnina?

„Ég held að við njótum engrar verndar hjá íslenska ríkinu,“ svarar Bogi sem telur að starfsmenn ferðist ekki hjá Icelandair vegna vildarpunkta heldur vegna gæða.

Icelandair sé stórt félag á Íslandi en „pínulítið flugfélag í alþjóðlegu samhengi.“ Hann jánkar því aðspurður að Play hafi ekki endilega verið stærsti samkeppnisaðili Icelandair.

„Við erum pínulítið peð í þessu samhengi og það er krefjandi að reka flugfélag á Íslandi,“ segir Bogi.

Hverjar eru tilfinningarnar þegar annar innlendur aðili fer í gjaldþrot?

„Þær eru ömurlegar. Þetta er lítill heimur, flugrekstur á Íslandi. Maður á vini og kunningja hjá Play og hugur okkar er hjá Play og ekki síður farþegunum sem eru því miður strandaglópar víða.“