Þor­steinn Skúli tekur formannsslaginn

Í fréttatilkynningu segir að Þorsteinn Skúli sé 38 ára Hafnfirðingur og búi með eiginkonu sinni og þremur börnum í Hafnarfirði. Hann hafi úrskrifast með meistaragráðu í lögfræði frá Háskólanum í Reykjavík árið 2014 en árið 2019 hafi hann sótt sér viðbótarnám í mannauðsstjórnun frá sama skóla. 

Þorsteinn hafi starfað hjá VR frá 2007 til 2021 og lengst af sem sérfræðingur á kjaramálasviði. Eftir fjórtán ár hjá VR hafi hann ráðið sig til starfa sem lögfræðingur hjá Sameyki stéttarfélagi. Þaðan hafi leið hans legið til Samtaka fyrirtækja í velferðarþjónustu. Í dag starfi Þorsteinn Skúli á mannauðs- og stefnusviði BYKO.

Reynsla af því að sitja beggja megin borðsins

„Ég hef ákveðið að gefa kost á mér í embætti formanns VR í formanns- og stjórnarkosningum sem fram fara innan félagsins í mars næstkomandi. Ég vil endurvekja rödd félagsfólks og vinna markvisst að bættum kjörum og jöfnuði. Sjálfur er ég vel kunnugur starfsemi VR þar sem ég átti fjórtán farsæl starfsár hjá félaginu og starfaði þar af lengst sem sérfræðingur á kjaramálasviði,“ er haft eftir Þorsteini Skúla. 

Reynsla hans af störfum bæði hjá stéttarfélögum og atvinnulífinu hafi gefið honum góða innsýn í að sitja beggja vegna borðsins og dýrmætan skilning á þörfum félagsfólks.

Formaðurinn eigi að vera óháður

„Sem formaður VR mun ég leggja áherslu á jöfnuð og bætt kjör fyrir öll. Ég vil skapa VR sem sameinar ólíkar raddir og tryggja það að félagsfólk á öllum aldri finni fyrir því að starfað sé í þeirra þágu. Ég mun fylgja eftir mikilvægum málum sem fyrrum formenn og öflugt starfsfólk félagsins hefur unnið að á síðustu árum. Má þar m.a. nefna uppbyggingu húsnæðis fyrir félagsfólk VR (Blævar), kjör hinna lægst launuðu, starfsmenntamál og mikilvægi þess að jafnrétti sé gætt í hvívetna hjá hinu almenna félagsfólki.“

Hann telji það grundvallaratriði að formaður VR sé óháður pólitík og einbeiti sér alfarið að málefnum félagsfólks. Þannig tryggi félagið opið og gagnsætt samtal við stjórnvöld, óháð því hvaða flokkar eru við völd og félagið megi aldrei láta pólitískar skoðanir skyggja á hagsmuni félagsfólks. 

„Það er mér hjartans mál að skapa sanngjarna og sterka framtíð fyrir félagsfólk og mun ég leggja mig allan fram í þetta mikilvæga hlutverk.“

Vill setja á fót leikskóla fyrir félagsfólk

Hér að neðan má sjá helstu stefnumál Þorsteins Skúla:

• Að setja á stofn leikskóla fyrir börn félagsfólks VR á aldrinum 12-24 mánaða.
• Að jafna rétt félagsfólks með því að varasjóður verði lagður niður í þeirri mynd sem hann er í dag og teknir upp fastir styrkir.
• Að þungaðar félagskonur fái auka 4 vikur við hefðbundinn veikindarétt á launum.
• Að félagsfólk geti ráðstafað launuðu leyfi vegna veikinda barna hvort heldur sé vegna veikinda barna/maka/foreldra.
• Að unnið sé áfram í jöfnun réttinda milli hins almenna og opinbera vinnumarkaðs, til að mynda með 36 stunda vinnuviku og 30 daga orlofi fyrir allt félagsfólk.
• Að eiga stöðugt samtal við stjórnvöld og samningsaðila vegna bættra kjara félagsfólks.