Tveir drengir hand­teknir á mót­mælum barna

Vilborg Saga Stefánsdóttir nemandi var viðstödd mótmælin og segir engan aðdraganda hafa verið að handtöku drengjanna.

„Það voru allir að færa sig yfir á annað svæði svo ég elti. Þar voru lögreglumenn í hrúgu með krökkunum,“ segir Vilborg Saga og að hún hafi tekið eftir einhvers konar orðaskaki á milli krakkanna og lögreglumannanna.

Héldu á súrmjólkurfernum

Hún segir að annar drengjanna hafi þá gengið burt en stuttu seinna hafi fimm lögreglumenn hlaupið að honum og haldið á honum í ómerktan lögreglubíl. Stuttu seinna hafi hinn drengurinn verið handtekinn af lögreglumönnum. Myndband af handtökunni má sjá hér að neðan.

Vilborg Saga segir að drengirnir hafi haldið á súrmjólkurfernum en hafi ekki verið að henda úr þeim á þinghúsið. Þeir hafi í raun ekkert verið að gera. Hún segir marga hafa verið orðið hrædda í kjölfar handtökunnar. 

Sýndu ekki meðalhóf

Ragnheiður Freyja Guðmundsdóttir var einnig á mótmælunum. Hún var ekki vitni að aðdraganda handtökunnar en segist hafa séð drengina flutta í lögreglubíl og telur að lögreglan hafi alls ekki sýnt meðalhóf við aðgerðir sínar.

„Það var rosalega mikill viðbúnaður lögreglu frá upphafi. Allt frá því að mótmælin hófust klukkan 11. Bæði fyrir framan Alþingishúsið og stór hópur lögreglumanna sem fór að aftan inn í hóp unglinga sem voru að mótmæla,“ segir Ragnheiður og að lögreglan hafi varið miklum tíma að tala við unglingana inn í hópnum.

„Heildarupplifunin var sérstök því lögreglan fór inn í hópinn allt frá upphafi mótmælanna. Ég held að upplifun unglinganna af því hafi ekki verið góð,“ segir Ragnheiður Freyja.

Tilkynnt til barnaverndar

Ásgeir Þór Ásgeirsson aðstoðarlögreglustjóri segir í samtali við fréttastofu að drengirnir séu á framhaldsskólaaldri og að þeir hafi verið handteknir og færðir á lögreglustöð. Þar hafi þeir verið sóttir af foreldrar sínum.

„Þeir voru handteknir fyrir að hindra lögreglu við störf, fyrir skemmdarverk og að fara ekki að fyrirmælum lögreglu, ítrekað,“ segir Ásgeir Þór.

Hvað varðar framhaldið segir hann ljóst að lögregla gerir skýrslu um málið og að þetta verði tilkynnt til barnaverndar. Ekkert annað hafi verið ákveðið.

Mótmælin fóru ekki vel fram

Mótmælin sem fóru fram á Austurvelli voru skipulögð af nemendum í Hagaskóla en þau mótmæltu aðgerðarleysi stjórnvalda þegar kemur að fjölskyldusameiningum fólks frá Gasa. Krakkarnir gengu út úr tíma klukkan 10.30 og niður á Austurvöll þar sem þau mótmæltu við Alþingi.

Spurður hvort að mótmælin hafi annars farið fram með góðum hætti svarar Ásgeir Þór því neitandi.

„Það var verið að grýta Alþingishúsið með eggjum og að finna klakabúta og grýta. Nei, ég myndi ekki segja að þetta hafi farið algerlega vel fram,“ segir Ásgeir.

Á mótmælum í gær og í dag mátti sjá fleiri lögreglumenn við störf en á fyrri mótmælum. Ásgeir segir að hvert mál metið fyrir sig og þörf á viðbúnaði.

„Við metum hvert mál og hvern viðburð fyrir sig. Þessir tveir hafa verið metnir þannig að við töldum nauðsynlegt að vera með fleiri lögreglumenn en við höfum verið með allajafna.“