Rifust um mann leiksins en Gummi Ben kom Alberti skemmtilega á óvart

Stúkan velur alltaf mann leiksins í hverjum leik en að þessu sinni komu sérfræðingarnir sér ekki saman um hver ætti að vera maður leiksins í 2-0 sigri ÍBV á KA.

Albert Brynjar var harður á því að varnarmaðurinn Elvis Bwomono ætti að fá útnefninguna en Lárus Orri vildi að Oliver Heiðarsson yrði valinn.

Oliver Heiðarsson skoraði glæsilegt mark í leiknum og lagði einnig upp fyrra mark Eyjamanna eftir frábæran sprett. Mörkin komu á fjögurra mínútna kafla í seinni hálfleik.

„Mér fannst þetta vera fimm mínútna kafli hjá ÍBV í þessum leik. Það gerðist ekkert mikið í þessum leik fyrir utan þennan fimm mínútna kafla. Tvö mörk sem komu og rauða spjaldið. Eyjamenn voru flottir og nýttu sín tækifæri vel þessar fimm mínútur,“ sagði Albert.

„Mér fannst Elvis flottur allan leikinn,“ sagði Albert. Elvis bjargaði nokkrum sínum vel auk þess að eiga stóran þátt í báðum mörkum Eyjaliðsins. Mörkin komu hins vegar til eftir frábæra spretti frá Oliver.

„Erum við að ræða þetta í alvörunni? Eigum við ekki bara að sjá þessi tvö mörk aftur,“ svaraði Lárus Orri.

„Það náðist ekki samkomulag á milli ykkar með þetta þá er ég með oddaatkvæði. Bara af því að Oliver er ber að ofan þá,“ sagði Guðmundur Benediktsson.

„Nei, nei, nei. Nei, nei, nei,“ heyrðist þá í Alberti en Gummi Ben kom honum á endanum á óvart þegar hann hélt áfram.

Það má sjá þetta skemmtilega brot úr Stúkunni hér fyrir neðan.