Aldís Schram fagnar fyrsta sigrinum gegn föður sínum

Lögreglustjórinn á höfuðborgarsvæðinu braut gegn þágildandi lögum um persónuvernd með vinnslu sinni á upplýsingum er vörðuðu Aldísi Schram. Þetta kemur fram í úrskurði Persónuverndar. Kjarninn greindi frá úrskurðinum í dag.

Aldís segir fyrsta sigurinn unninn í baráttunni við Jón Baldvin Hannibalsson, föður sinn og fyrrverandi utanríkisráðherra, sendiherra og þingmann. Hún hefur sakað föður sinn um kynferðisbrot í æsku og að foreldrar hennar hafi síðar fengið hana nauðungarvistaða á geðdeild Landspítalans.

Forsaga málsins er sú að Hörður Jóhannesson, þáverandi aðstoðarlögreglustjóri á höfuðborgarsvæðinu, afhenti Jóni Baldvini skjal í ársbyrjun 2012. Þar kom meðal annars fram að lögreglan hefði nokkrum sinnum árin á undan haft afskipti eða sinnt verkefnum vegna hennar.

„Lögreglan hefur nokkrum sinnum á undanförnum árum haft afskipti af Aldísi Baldvinsdóttur (kt. xxxxx-yyyy) eða sinnt verkefnum vegna hennar. Að gefnu tilefni skal tekið fram, að foreldrar hennar, Bryndís Schram og Jón Baldvin Hannibalsson, hafa aldrei kallað á lögreglu eða beðið lögreglu um aðstoð af neinu tagi hennar vegna. Þetta staðfestist hér með.“ (Undirskrift: Hörður Jóhannesson aðstoðarlögreglustjóri.)“

Jón Baldvin ræddi skjalið í viðtali í Silfrinu á RÚV í febrúar 2019 í kjölfar ásakana á hendur honum fyrir kynferðisbrot. Hann birti svo upplýsingar úr skjalinu í aðsendri grein í Morgunblaðinu nokkrum dögum síðar.

Ekki heimild fyrir vinnslu upplýsinga

Í úrskurði Persónuverndar kemur fram að lögreglustjórinn á höfuðborgarsvæðinu hafi verið ábyrgðaraðili vinnslu persónuupplýsinganna. 

Lögreglustjórinn á höfuðborgarsvæðinu gat ekki svarað Persónuvernd í hvaða tilgangi vinnsla skjalsins átti sér stað fyrir átta árum. Í svörum lögreglunnar kom fram að skjalið og þau gögn sem útgáfa þess byggði á hafi ekki verið varðveitt í skjalavörslukerfi embættisins og að embættið hafi ekki upplýsingar um forsendur afgreiðslunnar.

Hörður Jóhannesson hefur látið af störfum hjá lögreglunni. Aldís hefur kært Hörð til héraðssaksóknara fyrir að hafa afhent föður sínum skjalið, eða vottorðið eins og Aldís nefnir skjalið.

Með hliðsjón af því er að mati Persónuverndar ekki unnt að líta svo á að vinnsla persónuupplýsinga kvartanda í umrætt sinn hafi farið fram á grundvelli heimildar.

Fólk verði að geta treyst lögreglu

Þá telur Persónuvernd verða að leggja til grundvallar að einstaklingar megi almennt treysta því að upplýsingum sem lögregla skráir um verkefni sem hún sinnir vegna þeirra verði ekki miðlað til óviðkomandi aðila. 

Þar sem embætti lögreglustjóra hafi miðlað umræddum upplýsingum um kvartanda án heimildar hafi embættið ekki unnið upplýsingarnar með sanngjörnum, málefnalegum og lögmætum hætti gagnvart Aldísi.

„Fyrsti sigurinn unninn“ segir Aldís í færslu á Facebook.

Jón Baldvin hefur stefnt henni fyrir meiðyrði vegna orða sem hún lét falla í útvarpsþætti á Rás 2 í janúar í fyrra.

Aldís fullyrti í Morgunútvarpinu að Jón Baldvin hefði misnotað aðstöðu sína sem sendiherra er hann óskaði eftir því að Aldís yrði nauðungarvistuð á geðdeild. Jón Baldvin hafi notað til þess bréfsefni sendiráðs Íslands í Washington. Þá kom fram í þættinum að frásögnin væri staðfest í skjölum sem Ríkisútvarpið hefði undir höndum.

Deilur fyrir dómstólum

Ríkisútvarpinu og Sigmari Guðmundssyni, umsjónarmanni þáttarins, er sömuleiðis stefnt af ráðherranum fyrrverandi.

Þá lýsti Aldís því í þættinum að Jón Baldvin hefði virst hafa haft vald, sem sendiherra og fyrrverandi ráðherra, til að hringja í lögreglu og í framhaldinu hafi hún umsvifalaust verið sett í járn og flutt á geðdeild.

Sjálf hefur Aldís lengi fullyrt að Jón Baldvin hafi brotið kynferðislega gegn fjölda kvenna sem og henni sjálfri. Á móti hefur fjölskylda hennar haldið því fram að hún sé veik á geði og frásagnir hennar skuli ekki taka trúanlegar.

Jón Baldvin sætir ákæru héraðssaksóknara fyrir kynferðislega áreitni gagnvart annarri konu. Málið er til meðferðar hjá Héraðsdómi Reykjavíkur.