Vilja milljón hver frá manninum sem beraði sig

Foreldrar fjögurra drengja hafa farið fram á milljón hver í skaðabætur vegna manns sem beraði sig fyrir framan drengina og snerti kynfæri sín. Maðurinn býr á jarðhæð í Grafarvogi nálægt leikvelli og voru foreldrar í hverfinu ráðþrota vegna mannsins.

Í dag var greint frá því að ákæra hefði verið gefin á hendur manninum vegna háttseminnar. Maðurinn hefur áður fengið dóm árin 2011 og 2014 fyrir samskonar brot og hefur margoft verið tilkynntur til lögreglu.

Í ákærunni kemur fram að maðurinn sé ákærður fyrir blygðunarsemisbrot og ósiðlegt athæfi gegn barni.

Um tvö aðskilin atvik er að ræða, það fyrra í mars á síðasta ári og það seinna í maí sama ár. Í bæði skiptin stóð maðurinn við glugga á jarðhæð, nakinn að neðan og snerti kynfæri sín meðan hann fylgdist með drengjunum. Drengirnir voru 9 og 11 ára þegar brotin áttu sér stað.