Kynna óþekkta konu til leiks sem rétti Báru „ljósan mun, mögulega möppu“

Þingmenn Miðflokksins segja óþekkta konu hafa afhent Báru Halldórsdóttur „ljósan mun“ á Klaustri að kvöldi 20. nóvember. Bára hafi afhent henni smáhlut á móti. Þá hafi Bára notað fjórar mínútur, sem liðu frá því að hún gekk út af Klaustri og þangað til hún steig upp í bíl sinn, til að leggja á ráðin með samverkamönnum sínum. Þetta kemur fram í bréfum lögmanns þingmannanna til Persónuverndar í apríl.

Persónuvernd hafnaði í gær kröfu lögmanns þingmanna Miðflokksins um frekari gagnaöflun í máli þeirra en þeir höfðu m.a. óskað eftir frekara myndefni úr eftirlitsmyndavélum umrætt kvöld á Klaustri, upplýsingum um greiðslum inn á reikning Báru og símtöl og smáskilaboð til hennar. Stjórn Persónuverndar á þó enn eftir að úrskurða endanlega í málinu en ekki liggur fyrir hvenær það verður gert. 

Hafi aflað sér búnaðar og æft aðgerðir með vitorðsmanni

Í úrskurði Persónuverndar, sem fréttastofa hefur undir höndum, er m.a. vísað í bréf lögmanns þingmannanna sem sent var Persónuvernd þann 1. apríl. Þar kemur fram að samkvæmt myndefninu sem þá lá fyrir hafi Bára setið í bifreið sinni fyrir utan Klaustur í tólf mínútur áður en hún fór inn á staðinn. Þá er meðhöndlun Báru á síma, „svörtu stykki“, hvítum handfrjálsum búnaði og snúru sem loddi við hann lýst í smáatriðum.

Þá sé ljóst að fyrir liggi „óræk sönnun“ um að Bára hafi undirbúið aðgerð sína vel. Hún hafi til dæmis gert sér far um að „halda búnaði sínum fyrir utan sjónsvið viðstaddra með því að varðveita hann undir tösku sinni“. Þá hafi handfrjálsi búnaðurinn verið til þess að gefa þeim sem staddir voru á Klaustri „öryggi um að með þeim væri ekki fylgst“.

Til aðgerðanna hafi verið gengið með „skipulögðum og einbeittum hætti“. Þá séu ósannindi, sem Bára hafi „ítrekað viðhaft“ um gerðir sínar, þess eðlis að hún hljóti að hafa þurft með sér vitorðsmann til að fylgjast með ferðum manna, afla sér búnaðar, læra á hann og útfæra og æfa aðgerðir.

Með vísan til þessa óskaði lögmaður Miðflokksmanna eftir viðbótarmyndefni úr eftirlitsmyndavélum við Klaustur en áður hafði aðeins verið farið yfir myndefni sem sýndi Báru. Viðbótarmyndefnið hafa Miðflokksmenn skoðað tvisvar, fyrst um miðjan apríl og svo í síðustu viku.

Óþekkt kona með „ljósan mun, mögulega möppu“

Í bréfi sem lögmaður Miðflokksmanna sendi Persónuvernd 16. apríl síðastliðinn, eftir að fyrri skoðun á áðurnefndu myndefni fór fram, segir að á tilteknum tíma hafi óþekkt kona komið inn á Klaustur og „gengið ákveðið að innra rými staðarins og rakleitt, að því er virðist, til Báru Halldórsdóttur“.

Um það bil 20 sekúndum síðar gangi konan rösklega út af staðnum með „einhvern smáhlut í vinstri hendi“. Þá leiði samanburður myndefnis og hljóðefnis í ljós að Bára handfjatli iðulega símtæki sitt án þess að nokkrir skruðningar heyrist á hljóðupptökunni. Það staðfesti enn frekar að hún hafi notast við sérstakan búnað í aðgerðunum og að þær hafi verið skipulagðar rækilega í samstarfi við aðra.

Sjá einnig: Bára birtir greiðslurnar og segist ekki hafa neitt að fela

Í tölvupóstsamskiptum lögmanns Miðflokksmanna, sama dag og seinni skoðunin á myndefninu fór fram, er bent á að þegar Bára yfirgaf Klaustur hafi liðið tæplega fjórar mínútur þar til hún aflæsti bifreið sinni. Leiða megi líkum að því að þessar mínútur hafi hún notað til skrafs og ráðagerða við samverkamenn sína utan staðarins.

Þá er konan, sem fjallað var um í fyrri tölvupósti lögmannsins, aftur tekin til umfjöllunar. Á tilteknum tíma sjáist hún ganga fram hjá Klaustri og hafi í hægri hendi ljósan mun, mögulega möppu, tölvu eða spjaldtölvu. Rétt á eftir sjáist konan koma inn á staðinn en hafi þá fært muninn úr hægri endi í þá vinstri. Þegar konan gekk út af staðnum, eftir að hafa gefið sig á tal við Báru, hafi hún ekki haft ljósa muninn lengur með sér. Virðist hún því hafa afhent hann Báru, og Bára afhent konunni áðurnefndan smáhlut.

 

Hafnar öllu leynimakki

Bára sagði í samtali við Fréttablaðið í gærkvöldi að umrædd kona væri vinkona sín, sem hefði komið upp að sér og knúsað sig á Klaustri. Bára hafi svo sagt henni að hún væri upptekin og vinkonan hafi farið. Þá kannaðist Bára ekki við að þær hafi skipst á hlutum, líkt og haldið er fram í bréfi lögmannsins. „Það var enginn sem rétti mér eitt eða neitt,“ sagði Bára.

Þá sagði Bára það af og frá að hún hafi rætt við einhvern fyrir utan Klaustur. Hún hafi gengið hring í kringum Dómkirkjuna því hún hafi ekki viljað vera í beinni sjónlínu við þingmennina þegar hún labbaði út af staðnum.