Stöðvuðu framkvæmdir vegna asbests

Vinnueftirlit ríkisins stöðvaði framkvæmdir við Grensásveg 12 þar sem asbest hafði verið fjarlægt af húsinu án þess að sótt hefði verið um tilskilin leyfi.

Eftirlitsmaður stofnunarinnar tók framkvæmdasvæðið út. Í eftirlitsskýrslu kemur fram að starfsmaður fyrirtækisins hafi veitt eftirlitsskýrslu móttöku en neitað að kvitta undir hana.

Við skoðun kom í ljós að asbestleifar hefðu borist inn í húsið og væru á verkpöllum sem stóðu við það. Steinullarmottur sem höfðu verið fyrir innan asbestplöturnar höfðu á nokkrum stöðum fokið.

Þá voru gerðar athugasemdir við frágang á vinnupöllum en á einum stað vantaði gönguleið milli mishárra palla. Starfsmenn þurftu því að stökkva á milli. Athugasemd var einnig gerð við það að starfsmenn voru ekki með hjálma.