Deila um undirskriftir vegna íbúakosningar

Íbúakosning um nýsamþykkt deiliskipulag miðbæjar Selfoss er í hnút vegna þess að áhöld eru um það hvort undirskriftasöfnun fyrir kosninguna hafi farið rétt fram.

Í hinu nýja deiliskipulagi er gert ráð fyrir viðamiklum framkvæmdum í miðbænum þar sem endurbyggja á sögufræg hús, sem standa ekki lengur, víðs vegar af landinu. Andstæðingar þess telja að of þétt verði byggt á svæðinu og freistuðu þess að knýja fram íbúakosningu um málið.

Samkvæmt sveitarstjórnarlögum er unnt að knýja fram slíka kosningu riti 20 prósent atkvæðabærra íbúa undir yfirlýsingu þess efnis. Sveitarfélagi er heimilt að hækka þann þröskuld en þó má hann aldrei vera hærri en þriðjungur kjósenda. Árborg hækkaði sinn þröskuld með 63. gr. samþykktar um stjórn og fundarsköp sveitarfélagsins. Samkvæmt greininni þurfa 29 prósent að skrifa undir slíkan lista.

Á fundi bæjarstjórnar 22. mars sl. var slík undirskriftasöfnun heimiluð. Mætti hún hefjast daginn eftir og vera lokið 20. apríl. Alls skrifuðu 29,4 prósent íbúa undir. Áhöld eru hins vegar uppi um hvort rétt hafi verið staðið að söfnuninni.

Heimildir Fréttablaðsins herma að einhverjir íbúar telji að nafn sitt sé á listanum gegn þeirra vilja. Þá herma aðrir að þeir hafi talið sig vera að skrifa undir meðmælalista fyrir framboð í komandi sveitarstjórnarkosningum. Slíkar undirskriftir gætu hafa riðið baggamuninn við það að ná yfir 29 prósenta þröskuldinn.

„Það eina sem okkur hefur borist er afrit af bréfi frá Þjóðskrá um að farið hafi verið yfir undirskriftirnar. Þau gögn eru ekki næg heldur þurfa undirskriftalistarnir sjálfir að berast og sveitarstjórn að fara yfir þá samkvæmt ákvæðum reglugerðar um efnið,“ segir Ásta Stefánsdóttir, sveitarstjóri í Árborg.

Kassi með undirskriftum var afhentur lögreglu þann 20. apríl, hann innsiglaður og sendur Þjóðskrá. Sá var hins vegar sendur til baka og afhentur ábyrgðarmönnum á nýjan leik. Þeir skiluðu kassanum á ný þann 26. apríl. Kassinn var því óinnsiglaður um nokkurra daga skeið.

„Við fengum kassann aftur þar sem það vantaði upp á að rafrænt afrit af listanum fylgdi með kassanum. Við töldum okkur hafa uppfyllt okkar skyldu strax í upphafi en það var einhver misskilningur með það,“ segir Davíð Kristjánsson, einn þriggja ábyrgðarmanna söfnunarinnar.

Davíð segir að það sé alveg klárt mál að engar undirskriftir hafi bæst í kassann meðan rafrænn listi var útbúinn. Aðeins ábyrgðarmenn hafi haft aðgang að honum. Hann hafi heyrt af einhverri umræðu á netinu um að átt hefði verið við listann.

„Sveitarstjórnin vill birta listann í heild sinni og það stendur í okkur. Við teljum réttara að Þjóðskrá setji upp einhverja gátt þar sem fólk getur staðfest undirskrift sína. Það þætti okkur eðlilegast til að koma í veg fyrir að þetta verði gert tortryggilegt,“ segir Davíð.