Einhver þykist vera Birgir á Snapchat og Tinder og biður stelpur um myndir

Sífellt fleiri dæmi eru um að óprúttnir aðilar taki ljósmyndir og persónuupplýsingar ófrjálsri hendi af samfélagsmiðlum einstaklinga og geri svo falska reikninga í þeirra nafni á miðlum eins og Snapchat, Instagram, Facebook og Tinder.

Þar er látið líta út fyrir að viðkomandi sé notandi reikninganna þegar svo er ekki. Algengara er að þetta sé gert á Tinder og Snapchat þar sem virkni viðkomandi er ekki augljós og minna af upplýsingum sjáanlegar öðrum notendum.

Óþægilegt að vita ekkert

Oft hafa þessir óprúttnu aðilar átt í samskiptum við fólk í nafni annarra í langan tíma áður en það kemst upp. Birgir Örn Breiðfjörð grafískur hönnuður er einn þeirra Íslendinga sem eru að kljást við svona mál. Einhver hafði tekið myndir og upplýsingar um staðsetningu, áhugamál og annað af Instagram-reikningnum hans og svo stofnað bæði Tinder og Snapchat aðgang í hans nafni.

„Ég veit ekkert hvað hann er búinn að vera lengi að þessu eða hverja hann er búinn að vera að tala við eða hvers eðlis. Það er það sem er svo óþægilegt við þetta, maður veit ekkert í hvaða tilgangi er verið að nota auðkennið manns,“ segir Birgir í samtali við Vísi.

Fyrir rúmri viku hóf ókunnug stúlka samtal við Birgi á Facebook og virtist spjallið vera framhald af einhverju samtali sem hann kannaðist ekki við. Það kom svo í ljós að stúlkan taldi sig hafa átt í samskiptum áður við Birgi í gegnum Snapchat eða Tinder. Það var þá sem Birgir uppgötvaði að einhver væri að tala við fólk í hans nafni.

„Hann hafði beðið hana um að senda myndir af sér og þegar hún óskaði eftir til baka þá auðvitað kemur ekkert frá honum nema bara myndir af Instagramminu mínu.“

Birgir Örn veit ekki hver stofnaði þessa aðganga og gerði færslu um málið á Facebook og bað vinkonur sínar að taka skjáskot ef þær myndu sjá falska aðganginn þar. Hann fékk í kjölfarið nokkur skjáskot. Þessi aðili er líka á Snapchat undir notendanafninu birgirbreid. Birgir Örn hafði strax samband við Tinder og Snapchat til þess að tilkynna fölsku aðgangana. Hann hvetur fólk sem verður fyrir slíku að leita líka til lögreglunnar.

„Ég er búinn að tilkynna þetta til lögreglu og fá lögfræðing í málið. Þetta eru erfið mál en lögreglan er að skoða þetta, það eru fleiri svona mál í gangi.“

Hvetja einstaklinga til að vera á varðbergi

Knattspyrnumaðurinn og landsliðsmaðurinn Rúrik Gíslason varð fyrir þessu á dögunum og sagði hann þetta alvarlegt brot á friðhelgi einkalífs síns. Fékk hann lögfræðing í málið og ætlaði að málið til lögreglu.

Bubbi Morthens greindi frá því á síðasta ári að nethrellir hefði stofnað Instagram-reikning í sínu nafni og sent konum og stúlkum skilaboð. Hafði þessi aðili meðal annars stolið myndum af söngvaranum, eiginkonu og börnum. Bubbi reyndi að láta loka reikningnum en hann varð þá virkur aftur strax daginn eftir.

Ef samfélagsmiðlarnir eru opnir öllum eru meiri líkur á að óprúttnir aðilar geti tekið þaðan myndir og upplýsingar með það að markmiði að blekkja aðra.

 

Spending my fav time of the year with the best ones. I hope you all are having amazing holidays. Merry Christmas to you all . . . . . . #westfjords #iceland #christmas #holiday2017 #christmastree #xmas #love #happyholidays #family #qualitytime #suitup #menswear #bowtie #mensfashion #menshair #familylove #happymama #life #is #beauty #vegan #veganlife #veganchristmas #now

A post shared by ↟ BIRGIR BREIDFJORD ↟ (@biggi_breidfjord) on Dec 24, 2017 at 11:33am PST

Póst- og fjarskiptastofnun heldur úti síðunni Netöryggi en þar má finna ýmsan fróðleik. Varðandi vernd á spjallrásum eru þar gefin nokkur ráð.

• Vertu á varðbergi því viðmælandi þinn er ekki endilega sá sem hann segist vera. - Mynd sem þú færð senda er engin trygging.
• Gefðu aldrei upp heimilisfang, símanúmer eða önnur viðkvæm gögn til ókunnugra.
• Hver sem er gæti hafa komist yfir aðgangsorð viðmælenda þíns og þóst vera hann
• Ef þig grunar eitthvað misjafnt, spurðu viðmælandann um eitthvað sem eingöngu þið vitið.
• Gott er að opna eingöngu (allow) á samskipti við valda einstaklinga sem þú treystir.
• Til öryggis fyrir báða aðila er gott að hafa bæði hljóð og video á í spjallrásum.
• Hafðu í huga að viðmælandi þinn getur látið spjallforritið sitt skrá niður öll ykkar skriflegu samskipti
• Settu inn endurbætur spjallforrita jafnóðum og þær bjóðast