Vél Icelandair þurfti að hætta við lendingu í Keflavík því önnur vél var á brautinni

Vél Icelandair á leið frá Frankfurt þurfti að hætta við lendingu á Keflavíkurflugvelli í nótt því önnur vél reyndist vera á flugbrautinni. Svartaþoka var við Keflavíkurflugvöll á þessum tíma en vélin sem reyndist vera fyrir á flugbrautinni hafði misst af beygju út af flugbrautinni inn á akstursbraut. Vél Icelandair var á leið inn til lendingar þegar það varð ljóst og þurfti því að hætta skyndilega við og hækka flugið aftur.

Flugstjórinn tilkynnti svo farþegum að önnur vél hafi verið fyrir á flugbrautinni og var því flogið til Reykjavíkur þar sem lent var á Reykjavíkurflugvelli. Guðni Sigurðsson, upplýsingafulltrúi hjá Isavia, segir enga hættu hafa skapast vegna þessa. Þegar mikil þoka er við Keflavíkurflugvöll þá sé unni eftir verklagi í samræmi við lélegt skyggni. Er þá lengra bil á milli véla til að vera með borð fyrir báru.

„Og bara ein hreyfing í gangi í einu og öryggið algjörlega í fyrirrúmi,“ segir Guðni. Hann segir vél Icelandair hafa haft nægan tíma til að hækka flugið á ný þegar ljóst var að hin vélin hafði misst af beygjunni út af flugbrautinni. „Það var bara svo lítið skyggni að flugstjórinn missti af beygjunni út af flugbrautinni á akstursbrautina vegna þoku. Það er blindljósabúnaður og mjög fullkominn flugleiðsögubúnaður á Keflavíkurflugvelli og alls engin hætta á ferðum.“

Tvær vélar þurftu að lenda á Reykjavíkurflugvelli og ein á Egilsstaðaflugvelli vegna þoku við Keflavíkurflugvöll í nótt. „Það var einfaldlega of lítið skyggni,“ segir Guðni.

Aðspurður hvort þessi uppákoma, að vél hafi misst af beygju inn á akstursbraut, tengjast á einhvern hátt verkfalli flugumferðarstjóra svarar hann því neitandi. Skyggni hafi einfaldlega verið lítið og það hafi ekki haft neitt með flugumferðarstjórana að gera að að flugstjórinn missti af beygjunni.