Breyttu nafninu á flug­vél norska liðsins í „Ro Ro Ro Ro Airlines“

Norska landsliðið leigði auðvitað flugvél fyrir ferðalagið og menn róa því ekki yfir Atlantshafið, eins og einhverjir kynnu kannski að halda. Samt sem áður hefur fararmátinn fengið skýra vísun í einkennishróp norskra fótboltaáhugamanna á leikvöngum.

Á FlightRadar var flugvélin nefnilega skráð sem „Ro Ro Ro Ro Airlines“ en flugvélin flytur norsku hetjurnar heim á norska grund í flugi NCR720. Það er auðvitað bein vísun í Víkingaróður stuðningsmanna.

TV 2 fær einnig staðfest frá aðgerðastjórn norska hersins að tvær F-35 orrustuþotur muni fylgja flugvél landsliðsins á leiðinni inn yfir Osló. Flugvélarnar eru venjulega í viðbragðsstöðu fyrir NATO.

Í fyrstu var óljóst hvort það væri National Airlines, FlightRadar eða NFF sem stæði á bak við nýja nafnið. FlightRadar hefur svarað fyrirspurn TV 2.

„Við gerðum þessa breytingu til að fagna frábærum árangri liðsins á mótinu og þeim sterka anda og viljastyrk sem hefur unnið sér sess í hjörtum stuðningsmanna í Noregi og um allan heim,“ svarar Ian Petchenik, samskiptastjóri FlightRadar.

Alls varð tveggja og hálfrar klukkustundar seinkun á flugtaki í Bandaríkjunum. Þar af leiðandi urðu Norðmenn að seinka áheyrnarfundinum hjá Haraldi konungi. Eftir áheyrnarfundinn í höllinni mun allt liðið og krónprinsinn fara út á Hallartorgið til að róa.

Liðið og stuðningsliðið mun síðan fara í opna rútuferð um miðborg Óslóar frá höllinni. Á leiðinni er ætlunin að stoppa til að róa með fólkinu – bæði á Háskólatorginu og Ráðhústorginu. Það verður því nóg af víkingaróðri í kvöld og allt í beinni á norska ríkissjónvarpinu sem er aðgengilegt á sjónvarpsstöðvum Sýnar.

„Við hlökkum til að þakka konungsfjölskyldunni fyrir stuðninginn en ekki síst allri þjóðinni sem hefur verið með okkur í þessari ævintýralegu ferð,“ skrifar norska knattspyrnusambandið. 

Það hefur verið mikið um gleði og samkomur í kringum leiki norska landsliðsins á HM en það má búast við því að þessi gæti slegið þeim öllum við.