Guð­laugur segir Þor­gerði á hröðum flótta

„Mér finnst þetta skrítið og óeðlilegt að hún ætli bara ekki að taka umræður við pólitíska andstæðinga sína, hvorki um þetta né annað,“ segir Guðlaugur Þór Þórðarson í samtali við Vísi.

Vísir hefur sagt frá fyrirhuguðum kappræðum sem Gunnlaugur Jónsson hjá Paradigm hefur verið að skipuleggja en upprunalega hugmyndin var sú að þar myndu þau Þorgerður Katrín og Guðlaugur Þór mætast og skiptast málefnalega á skoðunum um þjóðaratkvæðagreiðsluna.

Guðlaugur Þór segir þetta hafa komið upp ítrekað.

„Þorgerður víkur sér undan því að taka þátt í rökræðum sem ráðherra verður auðvitað að gera í lýðræðislegu þjóðfélagi. Hún hefur vikið sér undan þessu ítrekað og ég veit það frá þeim sem eru að skipuleggja atburðinn. Hún fékk val um dagsetningar og það stendur örugglega enn.“

Og Gunnlaugur Jónsson staðfestir þetta. „Þorgerður hafnaði líka 15. og 16. ágúst. Svo bauð ég henni líka að stinga upp á öðrum degi, einhvern tíma í júlí eða ágúst, við myndum vinna með það en hún hafnaði því líka,“ segir Gunnlaugur Jónsson skipuleggjandi kappræðnanna. En Paradigm er félag sem stofnað hefur verið um umræður um samfélagsmál íslenskra og erlendra ræðumanna og hefur staðið fyrir nokkrum slíkum viðburðum. Frægastur gesta Paradigm er líklega doktor Jordan Peterson.

Guðlaugur Þór er orðinn þreyttur á því að Þorgerður Katrín vilji ekki skiptast á skoðunum við sig og aðra um þetta efni.

„Síðast þegar ég átti að mæta henni keyrði ég þrjú hundruð kílómetra, á Sprengisandi, og fékk svo þau skilaboð um morguninn að hún kæmist ekki. Það er ekki eðlilegt í lýðræðislegu þjóðfélagi að ráðherrar víki sér stöðugt undan því að ræða þau mál sem þeir eiga að verja og leggja sjálfir fram. Í þeim löndum sem við miðum okkur við tíðkast þetta ekki, að ráðherrar víki sér undan rökræðum,“ segir Guðlaugur Þór og bætir við: 

„Það er augljóst að hún treystir sér ekki í þessar umræður og það segir allt sem segja þarf um stöðu málsins.“