Norlandair mátti ekki bjóða í Ísa­fjörð á þessari flug­vél

Í kvöldfréttum Sýnar mátti sjá hvar verið var að gera Dash 8 Q200-vél Icelandair klára í flug til Ísafjarðar frá Reykjavíkurflugvelli. Félagið er það eina sem sendi inn tilboð í flugleiðina, tilboð sem Vegagerðin hefur núna hafnað sökum þess hversu hátt það var.

Eftir að Flugfélagið Ernir varð gjaldþrota og Mýflug hætti flugrekstri er Norlandair eitt eftir á innanlandsleiðum ásamt Icelandair. En hvers vegna tók Norlandair ekki þátt í útboðinu?

Því er svarað hér í sjónvarpsfrétt Sýnar:

„Skilyrði útboðsins voru þannig að þær vélartegundir sem við erum að reka, annars vegar Twin Otter og hins vegar King Air, - Twin Otter er ekki með jafnþrýstibúnaði, - skilyrðin voru með þeim hætti að það þyrfti að vera jafnþrýstibúnaður. Þá dettur Twin Otterinn út. 

Við gátum notað hins vegar King Air. En níu sæta vélin er bara of lítil fyrir Ísafjörð,“ sagði Arnar Friðriksson, framkvæmdastjóri Norlandair.

Flugvélar með jafnþrýstibúnaði geta klifrað í yfir 10.000 feta hæð og þar með upp fyrir veður. Arnar telur að ekki hafi verið þörf á að gera slíka kröfu í Ísafjarðarfluginu.

„Það er ekki frá flugtæknilegu sjónarmiði nauðsynlegt að hafa flugvél með jafnþrýstibúnaði á þessari flugleið.“

-Hvers vegna ekki?

„Þú þarft ekki að fara það hátt. Þú getur auðveldlega flogið þetta á Twin Otter,“ svarar Arnar.

Arnar minnir á að Norlandair noti Twin Otter í áætlunarflugi til Grænlands, samkvæmt samningi við þarlend stjórnvöld, og noti vélina einnig í flugi fyrir danska herinn þar allt árið.

„Þetta er fínasta vél í það sem við erum að gera og fín vél á Ísafjörð.

Enda erum við að nota Twin Otter í áætlunarflugi á Íslandi; til Grímseyjar, til Þórshafnar og til Vopnafjarðar.“

-Þannig að ef þetta yrði boðið út aftur og leyft að nota slíka vél, þá mynduð þið vera með í útboðinu?

„Þá myndum við íhuga það mjög alvarlega og sennilega taka þátt, já,“ svarar framkvæmdastjóri Norlandair.

Samkvæmt upplýsingum frá Vegagerðinni standa viðræður enn yfir við Icelandair um Ísafjarðarflugið og óvíst á hvorn veginn fer. Vonast er þó til þess að niðurstaða verði fengin fyrir lok næstu viku.

„Við bíðum bara átekta. Þetta er í ákveðnu ferli hjá Vegagerðinni. Sjáum hvað setur,“ segir Arnar Friðriksson.