Sendi­herra sem missti stöðuna vegna tengsla við Epstein hand­tekinn

Breska lögreglan hóf að rannsaka hinn 72 ára Mandelson fyrr í þessum mánuði eftir að ríkisstjórn Keirs Starmer afhenti gögn um samskipti sendiherrans fyrrverandi við Epstein. Reuters greinir frá.

Peter Mandelson sást leiddur burt frá heimili sínu í Camden í norðurhluta London síðdegis í dag af óeinkennisklæddum lögreglumönnum, að sögn BBC. Var hann settur í aftursæti ómerktrar bifreiðar. 

„Lögreglumenn hafa handtekið 72 ára gamlan mann, grunaðan um misferli í opinberu starfi,“ sagði í yfirlýsingu frá lögreglunni í London, í tengslum við rannsókn á fyrrverandi ráðherra.

„Hann var handtekinn í Camden mánudaginn 23. febrúar og hefur verið færður á lögreglustöð í London til yfirheyrslu.“

„Þetta kemur í kjölfar þess að heimildir til húsleitar voru veittar fyrir tvenn heimilisföng á Wiltshire- og Camden-svæðunum.“

Stórt nafn innan Verkamannaflokksins

Peter Mandelson hóf störf fyrir Verkamannaflokkinn á níunda áratugnum og hafði verið áberandi innan flokksins í áratugi. Hann gegndi lykilhlutverki í yfirburðasigri Tony Blair í kosningunum árið 1997.

Keir Starmer, forsætisráðherra Bretlands, skipaði hann sendiherra í Washington í desember 2024. Á þeim tíma lá fyrir að hann hefði verið vinur dæmda kynferðisafbrotamannsins Jeffreys Epstein.

Lávarðurinn Mandelson var rekinn úr starfi í september síðastliðnum eftir að forsætisráðuneytið sagði að nýjar upplýsingar hefðu komið fram sem sýndu hversu náið samband þeirra var.

Hann sagði af sér sæti í lávarðadeild breska þingsins eftir að birting nýrra skjala tengdum Epstein í Bandaríkjunum vakti nýjar spurningar um samskipti hans við kynferðisafbrotamanninn.

Fréttin er í vinnslu.