Sinueldur við Elliða­vatn

Fyrst um sinn var einn dælubíll sendur á vettvang og talið að hægt væri að ráða niðurlögum eldsins. Hins vegar tók eldurinn að dreifa sér og sést reykurinn út um allt höfuðborgarsvæðið. 

„Við erum ekki alveg að ná að hemja þetta,“ segir varðstjóri.

Sjúkraflutningamenn eru einnig á vettvangi. Dælubílar frá öllum stöðvum hafa verið kallaðir út. 

Samkvæmt ábendingu til fréttastofu hefur lögreglan lokað fyrir umferð um Flóttamannaleiðina vegna eldsins.

Myndir frá lesendum Vísis sýna að reykurinn sést alla leið vestur í bæ að Háskóla Íslands og þá finnst lykt af eldinum alla leið í Setbergið í Hafnarfirði. Dreifst hefur mikið úr eldinum á skömmum tíma miðað við ljósmyndir af vettvangi.

Alls hefur slökkviliðið farið í fimm útköll á rétt rúmum sólarhring vegna sinuelda víðs vegar á höfuðborgarsvæðinu.

Á svipuðum tíma í gær kom upp eldur á Kjalarnesi og í nótt kviknaði sinueldur bæði í Norðlingaholti og við Vífilsstaðavatn í Garðabæ. Fyrr í dag kviknaði eldur á Reykjavíkurflugvelli. 

Fréttin hefur verið uppfærð.