„Hættu­legasti maður Noregs“ fannst látinn í fanga­klefa

Ekki liggur fyrir hvað dró Stig Millehaugen, einn alræmdasta glæpamann Noregs, til bana. Hann fannst látinn í fangaklefa sínum í Kongsvinger-fangelsinu í Innlandet-fylki rétt fyrir klukkan átta að norskum tíma í morgun.

Lögreglan segir að lík hans verði krufið og starfsmenn og samfangar Millehaugen sem voru í samneyti við hann verði yfirheyrðir, að því er segir í frétt norska blaðsins VG.

Millehaugen varði nær öllum fullorðinsárum sínum í fangelsi fyrir morð, vopnað rán, þjófnað og bílstuld. Hann var dæmdur til 21 árs fangelsisvistar árið 2012 fyrir að hafa myrt leiðtoga glæpagengis gegn greiðslu.

Millehaugen strauk ítrekað úr fangelsi, síðast árið 2022 þegar hann skilaði sér ekki aftur eftir dagsleyfi. Lýst var eftir honum alþjóðlega og dauðaleit gerð að honum í Noregi.

Þegar Millehaugen strauk úr fangelsi árið 1992 skaut hann fangavörð til bana. Hann hlaut fangelsisdóm fyrir það morð árið 1993. 

Þá hafa norsk yfirvöld grunað Millehaugen um þriðja morðið frá því í fyrra, að þessu sinni á ræningja sem var skotinn til bana í Osló. Millehaugen var í leyfi frá fangelsinu þegar maðurinn fannst myrtur í skógi fyrir utan höfuðborgina. Hann neitaði sök en sagðist þó hafa orðið vitni að drápinu.