Kafla­skil: „Allt í einu er ekkert í daga­talinu“

Ósk Heiða Sveinsdóttir kinkar kolli. Og segir:

Sjálfsmyndin okkar er svo mikið tengd því hvað við gerum. 

Enda alþekkt að þegar fólk hittir annað fólk, segir það: 

Gaman að hitta þig og spyr síðan: 

Og hvað gerir þú?“

Umræðuefnið eru þau kaflaskil sem það að vera án atvinnu felur í sér. 

Að vera í atvinnuleit og það mögulega eftir að hafa verið í áberandi góðum og flottum stöðum áður. 

Eins og á við um bæði Gunni og Ósk.

Gunnur tekur undir það sem Ósk segir um sjálfsmyndina og hversu samofið sjálfsmyndin er oft störfunum okkar.

„Það er ákveðin berskjöldun í því að hafa verið Gunnur í Samkaup í svona langan tíma en verða allt í einu bara Gunnur. Þetta kallar á ákveðna sjálfskoðun, þar sem maður þarf að spyrja sig: Bíddu, ef ég er bara Gunnur núna, hver er ég þá?“

Framakonur í frama-fríi

Til að setja hlutina í samhengi, er best að segja fyrst frá því við hvað stöllurnar störfuðu áður. 

Gunnur sat í framkvæmdastjórn Samkaupa sem framkvæmdastjóri verslunar og mannauðsviðs. Gunnur starfaði í sjö ár hjá Samkaupum, sem á þessu ári sameinaðist Atlögu, áður Heimkaup.

Ósk hefur starfað við sölu- og markaðsmál um árabil. Var hjá Póstinum í sex ár, sat í framkvæmdastjórn Póstsins sem framkvæmdastjóri viðskiptavina og bar ábyrgð á markaðsmálum, sölu, þjónustu, upplifun viðskiptavina og vefmálum.

Báðar sitja þær í stjórn. Gunnur hjá TM líftryggingum, en Ósk í samtökunum WomenTechIceland.

Báðar hafa setið í fleiri stjórnum og báðar hafa tekið virkan þátt í ýmsu félagslífi atvinnulífsins.

Báðar búa yfir sterku tengslaneti í viðskiptalífinu; þekkja marga.

Báðar hafa hlotið verðlaun fyrir sín störf eða viðurkenningar. 

Þá er Ósk mentor hjá FKA og Gunnur hefur verið valin rísandi stjarna á 40/40 listanum eftirsótta fyrir mest spennandi stjórnendur framtíðarinnar og hlaut stjórnendaverðlaun Stjórnvísi 2022.

Vinskapur Gunnar og Óskar tengist einmitt þessari veröld þeirra sem framakonur. Því á viðburði tóku þær fyrst tal saman.

„Mig minnir að það hafi verið fyrst á viðburði hjá Stjórnvísi. Og ætli það hafi þá ekki bara verið nokkurn veginn þannig að ég hef gengið upp að Gunni, kynnt mig og sagt henni að mig langaði að verða vinkona hennar,“ segir Ósk og skellihlær.

Tíminn leið og fyrir algjöra tilviljun, kom í ljós snemma hausts að báðar væru þær á sams konar tímamótum nú; í atvinnuleit.

„Við erum í frama-fríi,“ segir Gunnur og viðurkennir að henni finnist það svolítið skemmtileg orðanotkun.

„Reyndar segjum við oft að við séum fjárfestar. Því við erum að fjárfesta í okkur sjálfum sem framakonur í frama-fríi.“

Æðisleg speglun

Fólk sem fylgist með þeim stöllum á LinkedIn hefur ekki farið varhluta af því að síðustu vikur hafa þær staðið fyrir viðburðum nýs hóps; Tengsla hringnum.

Í kynningartexta um hópinn segir:

Tilgangur þessa hóps er að skapa óformlegt samfélag fólks sem stendur á kaflaskilum í lífi sínu, óháð því hvort það sé í hefðbundinni dagvinnu eða einhvers annars staðar í lífinu. Markmiðið er að styrkja tengslanetið, hittast yfir bolla og hafa svolítið gaman.

Hugmyndin að Tengsla hringnum vaknaði yfir kaffibolla og nýbökuðum sörum í eldhúsinu hjá Gunni.

„Ég hafði sett færslu inn á LinkedIn þar sem ég segi frá því að ég sé í atvinnuleit. Ósk sendi mér í kjölfarið skilaboð, sagðist vera í sömu sporum og spurði hvort við ættum ekki að hittast í kaffi,“ segir Gunnur.

Það sem báðar upplifðu strax yfir þessum fyrsta kaffibolla, var hversu gott það er að geta talað um málin við einhvern sem er í sömu sporum. Að upplifa sömu stöðuna, sömu vangavelturnar, eða sömu sjálfskoðunina.

„Því maður hefur alveg líka farið í gegnum það að vera í ferli með eitthvað starf, eða verið spenntur eftir atvinnuviðtal. En fá síðan ekki starfið og upplifa höfnun,“ segir Gunnur einlæg.

Það felast líka mjög mikil viðbrigði í því að hafa alltaf verið með svaka upptekið dagatal í Outlook. 

Hafa lengi þurft að kíkja í dagatalið hvort maður hefði tíma fyrir þetta eða hitt eða þennan eða hinn.

Allt í einu er ekkert í dagatalinu,“ 

bætir Ósk við. Jafn einlæg og jafn til í að miðla af reynslunni. Því já; að upplifa kaflaskil eins og atvinnumissi eða atvinnuleit, er viss reynsla út af fyrir sig.

„En við fundum það svo sterkt sjálfar, hvað það gefur mikið að vera með svona góðan makker í hvor annarri. Að geta talað við einhvern um allt og speglað sjálfan sig,“ segir Gunnur og viðurkennir að hún verði eiginlega hálf meyr yfir því hvað vinskapurinn, samverustundirnar og stuðningurinn síðastliðnar vikur hefur verið gefandi fyrir þær báðar.

Að geta stutt svona við hvor aðra og speglað, varð að hugmyndinni um að efla fleira fólk í sömu sporum til að gera slíkt hið sama.

„Þannig að fólk átti sig á því að það er ekki eitt í sinni líðan eða tilfinningum. Ekkert okkar er fyrsta manneskjan til að standa í þeim sporum að vera milli starfa og ekkert okkar er það síðasta sem stendur í þessum sporum,“ segir Ósk og bætir við:

„Enda hefur það gerst nú þegar hjá Tengsla hringnum að þar hefur fólk verið að hittast í fyrsta sinn og þau kynni strax skilað einhverju eins og til dæmis atvinnuviðtali, nýjum verkefnum og fleira.“

Dýrmæt sjálfskoðun

Gunnur og Ósk segja kaflaskil sem þessi tvímælalaust kalla á ákveðna sjálfskoðun.

„Ég er mjög fegin því eftir á að hyggja að hafa ekki farið beint úr starfinu hjá Samkaupum yfir í nýtt stjórnendastarf. Það hefði einfaldlega ekki verið jafn gott fyrir næsta vinnuveitanda,“ segir Gunnur og bætir við:

„Því þessi reynsla mun líka efla okkur sem stjórnendur í næstu verkefnum. Við munum án efa horfa öðruvísi á ráðningaferlið hér eftir, upplýsingaflæðið því tengt og fleira. 

Þetta er óskaplega dýrmæt reynsla, þótt auðvitað reyni það líka á sjálfstraustið, svo það sé einfaldlega sagt.“

Eitt af því sem Gunnur og Ósk segir gefast mjög vel á þessum tíma sem atvinnuleitin er, sé að mæta á alls kyns ókeypis viðburði, námskeið sem bjóðast og fleira. Það fylli ekki aðeins upp í nýtilkomna tóma dagatalið, heldur hjálpi það líka til við sjálfskoðunina.

„Því það er einmitt með því að sækja ólíka viðburði og fræðslu, sem maður lærir mest um það fyrir hverju maður sjálfur brennur, hvar áhuginn og ástríðan liggur,“ segir Ósk og nefnir sem dæmi viðburði sem þær hafa sótt saman hjá fagfélögum, fyrirtækjum og fleira; allt frá því að hafa verið öflugir tengslamyndunarviðburðir yfir í fræðslu um stjórnarsetu, öryggismenningu, jafnvel það að leika sér með Legó!

„Við elskum líka ókeypis kaffi,“ bætir Gunnur við og hlær.

Ósk segir líka frá skemmtilegu dæmi um það, hvernig hægt er að nota gleðina, jákvæðnina og jafnvel húmorinn í atvinnuleitinni. Þótt það kalli á að fara út fyrir þægindarrammann.

„Í síðustu viku skellti ég mér til Noregs með 120 manns úr félagi mannauðsfólks, þar af mörgum mannauðsstjórum. Sem er þó ekki mitt svið. Ég kynntist fullt af fólki sem ég þekkti ekki áður og í þetta sinn gat ég ekki samofið sjálfsmyndina mína við starfið sem ég væri í, heldur þurfti ég að segja að ég væri á milli starfa og í atvinnuleit,“ segir Ósk og bætir síðan hlæjandi við:

„Og auðvitað grínaðist ég þá bara með að uppi á hótelherbergi væri ég með 120 útprentaðar ferilskrár sem ég myndi dreifa á hópinn.“

Að koma sjálfum sér á framfæri, segja frá atvinnuleitinni og nýta tengslanetið er einmitt liður í því sem fólk í atvinnuleit verður að vinna í.

Þótt það sé stundum svolítið erfitt skref.

„En þá þarf maður bara að hugsa: Við tvær höfum til dæmis báðar verið duglegar að koma okkur á framfæri síðustu árin, væri ekki svolítið skrýtið að ætla að hætta því núna, þegar við erum í þessum kaflaskilum?“

Arftakaáætlun?

Gunnur og Ósk segja báðar að það sé frábær tilfinning að finna hversu mikla trú á þeim fólk hefur almennt.

Að sama skapi myndi það ákveðna pressu: að fara að finna gott starf!

Því það gildir það sama í þessu og öðru; við erum flest öll mjög dugleg að peppa upp hvort annað en ofboðslega dómhörð og gagnrýnin á okkur sjálf,“

 segir Gunnur.

Að peppa hvort annað upp er þó ekki aðeins það sem Tengsla hringurinn hefur náð að gera. Því nú tilheyra hópnum hátt í 300 manns.

„Fólk hefur einfaldlega verið að skrá sig í hópinn á LinkedIn og mæta á viðburði, til þess að fræðast og kynnast öðru fólki,“ útskýra stöllurnar.

Á nokkrum vikum fór því svo, að vinkonurnar hafa áttað sig á því að Tengsla hringurinn er einfaldlega kominn til að vera.

Eitthvað sem er samfélagslega gott, er að virka fyrir fólk á svo margvíslegan hátt. Byggja upp og valdefla.

En nú er nokkuð fyrirséð að áður en varir, verðið þið aftur komnar á hvolf í einhver spennandi störf og með stútfullt dagatal að sinna: Hvað verður þá um Tengsla hringinn?

„Tja, þetta er augljóslega vísir á að við þurfum einhverja mjög góða arftakaáætlun,“ svarar Gunnur og Ósk tekur undir með skemmtilegum hlátri.