Hafa hirt tugi hræja í höfuð­borginni og fleiri kettir sendir í sýna­töku

Holskefla tilkynninga um dauða og veika fugla barst Matvælastofnun um helgina, flestar af höfuðborgarsvæðinu, en veiran hefur greinst víðar um landið. Fuglaflensan hefur í flestum tilfellum herjað á grágæs og nokkrar álftir einnig. Dýraþjónusta borgarinnar hefur hirt tugi hræja síðastliðna daga. „Ég held að þetta sé, það sem er búið að hirða upp af dauðum fuglum eru örugglega 30-40 fuglar núna bara frá því um helgina. Og í dag, jafnvel 60,“ segir Þorkell Heiðarsson, deildarstjóri dýraþjónustu Reykjavíkur.

Myndin hér að ofan sýnir poka sem fullir eru af hræjum sem hirt voru í morgun. Þegar fréttastofa var á vettvangi í Vatnsmýrinni eftir hádegi höfðu fundist um tuttugu hræ til viðbótar á skömmum tíma.

 Dýraþjónusta Reykjavíkur tekur við ábendingum um dauða og veika fugla á öllu höfuðborgarsvæðinu í samstarfi við nágrannasveitarfélög. „Gæsir til dæmis sem hegað sér undarlega og eru reikular í spori og virðast vera með einhver einkenni frá miðtaugakerfinu,“ útskýrir Þorkell.

Dýraþjónustan hefur verið MAST innan handar síðan fyrstu tilfelli fuglainflúensunnar H5N5 greindust í haust og tekið blóðsýni úr um fjörutíu fuglum.

„Þau sýni sem hafa komið inn að undanförnu hafa verið sýkt, eða jákvæð, fyrir fuglaflensunni,“ segir Þorkell og minnir á að fólk eigi alls ekki sjálft að handfjatla veika eða dauða fugla.

Fuglavinur fagnar hlákunni

Veikindi fuglanna hafa ekki farið framhjá fuglaáhugakonunni Arianne Gähwiller sem daglega og gefur fuglunum fóður út við Gróttu á vegum félagsskaps sem nefnist Björgum dýrum í neyð. Hún segir það alvanalegt að fugl drepist í auknum mæli á veturna, en flensan nú geri illt vera. Sjálf hafi hún rekist á nokkur hræ að undanförnu.

Arianne var mætt með fullan poka af fóðri í dag en gætir sín á því hvar fóðrinu er dreift. „Hérna er fullt af skít, og skíturinn er núna á þessari stundu ekki gott fyrirbæri þegar þessi veira er. Þannig ég er að reyna að finna mér nýjan stað á hverjum degi þannig þeir séu ekki að borða á sama stað aftur,“ segir Arianne.

„Hér hef ég orðið vör við einn og einn dauðan fugl. Mér finnst mikilvægast að þetta sé tekið strax og ekki látið liggja. Af því að svo fer náttúrlega hrafninn í til dæmis dauða gæs og hann gæti borið þetta áfram, og kisur og hundar líka,“ segir Arianne.

Hún segir hláku undanfarinna daga geta verið af hinu góða. „Það er nefnilega svolítið slæmt þessi fuglaskítur þegar ís getur veira lifað, samt er gott að fá svona hláku og svo ís aftur þá drepst það. En ef það er bara ís þá helst veiran lengur. Það er mjög gott á Íslandi, það kannski bjargar okkur svolítið að fá svona hlákutíð inn á milli,“ útskýrir Arianne sem tekur þó fram að sjálf sé hún ekki líffræðingur.

Sýni tekin úr fleiri köttum

Tveir heimiliskettir hafa til þessa greinst smitaðir af flensunni en samkvæmt upplýsingum frá MAST hafa fleiri kettir verið sendir í rannsókn og er verið að bíða eftir niðurstöðum úr því. Eigendum hunda og katta er ráðlagt að sýna aðgát og halda heimilisköttum inni eða hafa þá í taumi á meðan flensan gengur yfir.

„Dýraþjónusta Reykjavíkur tekur undir ráðgjöf frá dýralæknum og sérfræðingum Matvælastofnunar að halda heimilisköttum inni á meðan þessi skæða inflúensa gengur yfir en hún er bráðsmitandi og getur borist í ketti líkt og fugla. Ef viðra þarf kettina er mælt með að hafa þá í taumi. Þá er þeim tilmælum beint til hundaeigenda að gæta þess að hundar þeirra fari ekki í hræ af fuglum þótt engin staðfest smit yfir í hunda séu þekkt á þessum tímapunkti,“ segir í tilkynningu frá Reykjavíkurborg.

Auk MAST, tekur Dýraþjónusta borgarinnar við ábendingum og tilkynningum um dýr í vanda á höfuðborgarsvæðinu.

„Fólk er beðið um að gefa góða lýsingu á staðsetningu fuglanna og ef mögulegt er, senda myndir. Ef fólk verður vart við fugla í vanda eða dauða fugla utan þjónustutíma Dýraþjónustunnar er það beðið um að hafa samband við Lögregluna á höfuðborgarsvæðinu,“ segir í tilkynningunni.