Fóru í óboðað eftir­lit vegna á­bendinga um slæman að­búnað leikskólabarna

Stjórnendur skólans hafa verið boðaðir á fund vegna málsins á mánudag. Þetta segir Hjördís Rut Sigurjónsdóttir upplýsingafulltrúi hjá Reykjavíkurborg. Þá segir hún að vinnslu málsins verði haldið áfram í næstu viku. 

Tilefni heimsóknar starfsmanna borgarinnar eru ábendingar til borgarinnar um aðbúnað barna og um leikskólastarfið sjálft. Hjördís segir borginni hafa borist nokkrar tilkynningar en vildi ekki fara nánar út í efni þeirra eða hvaðan þær komu. 

Skilin eftir í köldum herbergjum og fari ekki út

Leikskólinn var til umræðu í Facebook-hópnum Mæðratips í vikunni. Fyrrverandi starfsmaður leikskólans setti þar inn færslu þar sem hún sagði börnin aldrei fara út að leika, að ekkert skipulagt starf væri í leikskólanum og að flest börnin væru grátandi mest allan daginn og að væflast um í herbergjunum. 

Þá sagði hún börnin reglulega skilin eftir í litlum og köldum herbergjum með gömul og óspennandi leikföng. Í þessum herbergjum væru þau frá því að þau mæti um klukkan 8 og til klukkan 11. Þá fari þau að borða og leggja sig. Eftir það fari þau aftur í herbergin.

Þá sagði hún matinn eins allar vikur og að á leikskólanum starfi of fáir starfsmenn og fáir skilji íslensku. Þá sagði hún einnig starfsmenn reglulega pirra sig á börnunum.

„Þetta á svo mikið sameiginlegt með geymslu, börnin finna líka alveg fyrir því að það sé meira eins og þau séu í geymslu á meðan mamma og pabbi eru að vinna,“ segir starfsmaðurinn fyrrverandi í færslunni sem nú hefur verið tekin út.

Ráðlagt að skilja barn eftir bundið í vagni

Fjölmargir skrifuðu athugasemdir við færsluna og þar á meðal aðrir fyrrverandi starfsmenn sem töluðu á svipuðum nótum.

„Ég hef sömu sögu að segja, ég var þarna í tæpa 3 mánuði og svo fékk ég nóg og tók stelpuna mína af leikskólanum,“ segir ein á meðan önnur segir: 

„Ég vann þar í stuttan tíma og það var nákvæmlega svona.“

Sú þriðja segist hafa unnið þarna í stuttan tíma og að það hafi verið skelfilegt.

„Var ráðlagt að skilja barn eftir í vagni inni í herbergi þar sem það var bundið niðri og það látið gráta. Barnið var í aðlögun og átti bara að grenja þetta úr sér. Þá var aldrei farið út,“ segir hún og að börnin hafi ekki mátt drekka vatn í matartíma.

Ekki náðist í Valgerði H. Valgeirsdóttur leikskólastjóra til að fá viðbrögð vegna eftirlitsheimsóknarinnar og umræðu um leikskólann á Mæðratips.

Lundur breytist í töfraheim

Í skýrslu leikskólans fyrir skóla- og frístundaráð Reykjavíkur fyrir leikskólaárið 2023-2024 segir Valgerður að líkt og árin á undan hafi lánið leikið við leikskólann. Flest hafi gengið upp og allt sem máli skipti. Ekkert vandamál hafi reynst óyfirstíganlegt og allir komist heilir heim í lok dags.

Talsverð þróun hafi verið innan leikskólans. Dagskipulagið verið endurskoðað með tilliti til meiri sveigjanleika með þeim árangri að börnin hafa ennþá meira val. 

„Lífið teygir anga sína um húsið og það breytist í þann töfraheim sem leikskólar eiga að vera, þar eru skógar fullir af dýrum, þar er eldhúsið heima með sjóðandi bullandi pottum og pönnum, að ógleymum stórvirkum vinnuvélum sem moka í burtu öllu því sem fyrir verður. Þessir leikir eru gjörningar án óhreininda ólíkt því sem gerist þegar hann færist út á útivistarsvæðið.“

Valgerður segir starfsfólk í Lundi einstakt, standi sína plikt og fyrir það beri að hrósa og þakka. 

„Foreldrar í Lundi sýndu af sér og hafa sýnt mikið æðruleysi og skilning gagnvart öllum breytingum á starfsemi leikskólans sem oftar en ekki hefur átt sér stað með litlum sem engum fyrirvara. Fyrir það ber einnig að hrósa og þakka. Í lok hvers leikskólaárs er það mikil gæfa hvers leikskóla og starfsfólks hans að geta með stolti horft um öxl og sagt: Hér eru og voru hamingjusöm börn sem öll komust heil heim að kvöldi dags, döfnuðu og þroskuðust, sátt og sæl við allt og alla.“

Foreldraráð í skýjunum

Þá má finna í skýrslunni umsögn foreldraráðs en ráðið skipi fólk sem hafi reynslu af því að vera með börn á Lundi. Það hafi átti samtöl við starfsfólk og stjórnendur í leikskólanum og telji sig hafa góða þekkingu á starfinu þar.

„Eftir að hafa kynnt sér starf og stefnu leikskólans auk þess að hafa reynslu af starfi leikskólans er það mat foreldraráðs að Lundur er sérstaklega vel heppnað úrræði í leikskólamálum ungbarna. Er það skoðun foreldraráðs að mikilvægt sé að starfsfólks leikskólans sé viðmótsblítt og sinni starfi sínu af fagmennsku og leggi sig fram við að láta bæði börnum og foreldrum líða vel með að barnið sé í þeirra umsjá,“ segir í umsögn foreldraráðs. 

Að mati foreldraráð virðist almenn og mikil ánægja á meðal foreldra með það starfsfólk sem hafi valist í störf leikskólans. 

„Foreldraráð lýsir yfir ánægju með regluleg foreldrasamtöl sem eiga sér stað í leikskólanum. Samtölin eru bæði upplýsandi og lærdómsrík fyrir foreldra þeirra barna sem eru á leikskólanum. Foreldraráð lýsir einnig yfir mikilli ánægju með hversu auðveld og persónuleg samskipti við starfsfólk og leikskólastjóra Lundar eru. Upplýsingagjöf er góð og samskipti við starfsfólk auðveld og aðgengileg.“ 

Ábendingar ráðsins snúi að ástandi malarvegar sem liggi upp að leikskólanum. Hann sé holóttur og ryk geti þyrlast upp og borist yfir leikvöll og útisvæði barnanna. 

„Foreldraráð telur óhætt að fullyrða að allir foreldrar myndu glaðir kjósa Lund sem leikskóla fyrir komandi kynslóðir barna sinna.“