Brá sér frá í sauð­burð og kvíðinn ferða­maður flúði

Konan keypti þjónustu af fyrirtækinu um miðjan apríl á þessu ári vegna ferðar hennar um Ísland milli 13. til 18. maí. Hún borgaði 847 Bandaríkjadali, sem jafngildir um 117 þúsund krónum, fyrir gistingu í fimm nætur víðs vegar um landið og afnot af bílaleigubíl.

Síðdegis þann 16. maí kom konan á gistiheimili þar sem hún átti bókað. Enginn starfsmaður var í móttökunni heldur virtist gistiheimilið mannlaust.

Olli henni miklum kvíða

Miði með nafni hennar og lykli beið hennar á borði móttökunnar. Í úrskurði kærunefndarinnar er haft eftir konunni að vegna þess að hún var einsömul á ferðalagi hafi þessar aðstæður valdið henni miklum kvíða.

Þá hafi hún verið búin að panta ákveðið herbergi, en lykillinn hafi verið að öðru herbergi sem hafi litið út eins og geymsla. Hún tók ljósmyndir af herberginu sem lágu fyrir í málinu.

Konan sagðist hafa fundið einhver símanúmer í móttökunni, en hún hafi ekki getað hringt í þau því sími hennar virkaði ekki á Íslandi. Hún hafi því brugðið á það ráð að keyra á annan stað í þeim tilgangi að borða kvöldmat. Hún hafi ekki talið sig örugga á gistiheimilinu og borgaði því tvö hundruð Bandaríkjadali, tæplega 30 þúsund, fyrir aðra gistingu.

Beið eftir konunni til miðnættis

Daginn eftir hafi hún haft samband við áðurnefnt fyrirtæki sem hafi hafnað því að endurgreiða henni. Hún krafðist þess að fá tvö hundruð dali endurgreidda. Það var á þeim forsendum að gistingin sem hún pantaði hafi ekki verið sú sem hún fékk.

Í gögnum málsins kom fram að eigandi gistiheimilisins hefði brugðið sér frá síðdegis þennan dag vegna sauðburðar. Hann hafi skilið eftir áðurnefndan miða með símanúmeri sínu myndi hún vilja ná í hann. Eigandinn sagðist síðan hafa komið aftur skömmu síðar og beðið konunnar til miðnættis, en hann vissi ekki að hún hefði komið og farið.

Kærunefndin féllst á það með konunni að það herbergi sem hún fékk úthlutað hafi ekki verið jafn gott og herbergið sem hún pantaði. 

Þrátt fyrir það hefði ekki verið fullreynt milli hennar og eiganda gistiheimilisins að leysa úr þeim vanda þar sem hún hefði yfirgefið staðinn strax í leit að annarri gistingu, og tilkynnt eigandanum og fyrirtækinu það daginn eftir. Því hafnaði nefndin kröfu konunnar.