„Ég vil auð­vitað klára kjör­tíma­bilið“

Þetta kom fram í Sprengisandi á Bylgjunni í dag þar sem þau þrjú ræddu komandi kosningavetur, stöðu ríkisstjórnarinnar og efnahagsmál.

„Ég get tekið undir með Svandísi um það að mér finnst alltaf heppilegra að kjósa að vori, og þá ekki síst vegna starfa þingsins, að það sé ekki kosningabarátta yfir sumarið og fjárlögin svo í tímaþröng,“ segir Jódís, sem er í framboði til varaformanns Vintri grænna.

Svandís Svavarsdóttir tilkynnti það í vikunni að hún gæfi kost á sér til formanns Vinstri grænna á landsfundi flokksins sem haldinn verður næstu helgi. Þá sagði hún í leiðinni að fólk ætti að setja sig í stellingar fyrir þingkosningar í vor.

Skynsamlegt að landsfundurinn taki samtal um stjórnarsamstarfið

Þá liggur fyrir að ályktun um möguleg stjórnarslit verði rædd á landsfundinum. Jódís segist ekki hafa myndað sér sérstaka skoðun á því, skynsamlegast sé landsfundurinn taki það samtal og svo verði ákvarðanir teknar í framhaldinu.

„Svo ég sé alveg heiðarleg, þá var ég efins um það hvort það væri gott að fara áfram í samstarf eftir síðustu kosningar. En svona með þeim rökum eins og margir nota, að allar ríkisstjórnir séu betri með VG innanborðs, þá studdi ég það á sínum tíma,“ segir hún.

Sjá einnig: Vilja ályktun um stjórnarslit á dagskrá hjá VG

Hún segir að kjörtímabilið hafi verið þungt og mörg gríðarlega flókin mál hafi komið upp. Nú fari þessu samstarfi að ljúka og Vinstri græn þurfi að fara huga að því hvað gerist næst.

Formenn þurfi að setjast niður og ákveða hvenær kosningar verða

„Það er auðvitað þannig og við vitum hvernig ríkisstjórnarsamstarf virkar, að það er auðvitað formannanna að setjast niður og taka ákvörðun um þetta, ef það á að boða snemma til kosninga,“ segir Lilja.

Hún sjálf vilji klára kjörtímabilið.

Hún segir að það skipti miklu máli að verðbólgan haldi áfram að lækka svo vextir geti farið að lækka. Það sé hagur allra.

„Við sjáum hvernig staðan er, við náðum langtímakjarasamningum, verðbólgan er að lækka, hagvöxtur hefur verið mikill, þannig eins og formaðurinn sagði á sínum tíma þá er allt að koma,“ segir Lilja.

Hún segir að verðbólgan hafi verið hærri á Íslandi en víða annars staðar, meðal annars vegna þess að „Covidið“ í ferðaþjónustunni hafi verið erfiðara fyrir okkur. Meira hafi verið sett í Covid-aðgerðir og Seðlabankinn hafi lækkað vexti meira hér, þannig það hafi alveg verið viðbúið að verðbólgan yrði hér hærri og það myndi taka aðeins lengri tíma.

Vill kosningar fyrir áramót

„Ég vil kjósa sem fyrst. Ekki í febrúar heldur enn fyrr, ég vil kosningar fyrir áramót,“ segir Sigmar Guðmundsson, þingmaður Viðreisnar.

Hann segir að löndin í kringum okkur hafi einnig gengið í gegnum Covid, og hafi einnig þurft að glíma við dýrari aðfangakeðjur og vörur vegna stríðs og séu í sömu aðstöðu og við hvað það varðar.

Þrátt fyrir þetta séu vextir mun hærri hér en víða í Evrópu sem og verðbólga.

Hann segir að það sé engin meiri pólitísk óvissa en þegar þessi ríkisstjórn situr við völd.

„Það er verið að ræða orkumál, útlendingamál, flokkarnir hafa verið að rífast um þetta núna að undanförnu, þau ná ekki saman um þetta. Það sama má segja um ríkisfjármálin, við vitum hvað það er langt á milli VG og Sjálfstæðismanna,“ segir hann.

Hann segir að eyða þurfi pólitískri óvissu með kosningum.

Lilja segir að hagvöxtur á Íslandi hafi verið mun meiri en á Evrusvæðinu síðustu ár. Okkar hagvöxtur sé meira í takt við það sem hafi verið að gerast í bandaríska hagkerfinu.

„Þess vegna er ég svo ekki hlynnt því að við förum í Evrópusambandið, vegna þess að við sjáum ríki eins og okkar, þar sem við höfum í raun og veru verið að kæla hagkerfið okkar af því það er svo mikill kraftur í því og þess vegna hefur það tekið lengri tíma hjá okkur að láta verðbólguna minnka,“ segir Lilja.

Viðtölin eru lengri og hlusta má á þáttinn í heild sinni hér: