Skoða að leyfa á­rásir í Rúss­landi með banda­rískum vopnum

Biden hefur ekki viljað leyfa Úkraínumönnum að nota dróna frá Bandaríkjunum, Himars-kerfi eða ATAMCS eldflaugar til árása í Rússlandi, af ótta við stigmögnun. Nú á sér hins vegar stað umræða um að draga úr þessum takmörkunum svo Úkraínumenn geti gert árásir á eldflaugakerfi og stórskotaliðsvopn Rússa nærri Karkív, samkvæmt frétt new York Times.

Samkvæmt heimildum miðilsins hefur umræðan ekki enn náð á borð Bidens með formlegum hætti. Blinken er þó sagður hafa það í huga.

Rússar hafa á undanförnum vikum gert umfangsmiklar árásir nærri Karkív-borg, í Karkív-héraði í norðausturhluta Úkraínu. Borgin er sú næst stærsta í Úkraínu og situr í einungis þrjátíu kílómetra fjarlægð frá landamærum Rússlands.

Rússar hafa komið fyrir vopnum þeirra megin við landamærin og eru þau notuð til að gera árásir á úkraínska hermenn og borgara í Karkív. Úkraínumenn hafa ekki getað notað bandarísk vopn til að ráðast á Rússa og draga úr þessum árásum.

Úkraínumenn vilja einnig nota bandarísk vopn til árása á rússneska innviði og olíuvinnslur.

Bretar leyfa árásir

Ráðamenn í Bretlandi hafa sagt að Úkraínumenn megi nota „Storm Shadow“ stýriflaugar frá þeim til árása innan landamæra Rússlands. David Cameron, utanríkisráðherra Bretlands, sagði nýverið að Úkraínumenn hefðu rétt á því að svara fyrir sig.

Þau ummæli leiddu, auk annarra, til þess að Rússar héldu opinberar æfingar með svokölluð taktísk kjarnorkuvopn á dögunum.

Frá því Rússar réðust inn í Úkraínu í fyrra hafa ráðamenn þar ítrekað hótað notkun kjarnorkuvopna. Það hefur sömuleiðis ítrekað verið gert í ríkisreknum sjónvarpsstöðvum Rússlands og dagblöðum. Hótunum þessum hefur að miklu leyti verið ætlað að draga úr vilja ráðamanna Vesturlanda til að standa við bakið á Úkraínumönnum.

Sjá einnig: Æfa notkun „taktískra“ kjarnorkuvopna

Bandaríkjamenn eru einnig sagðir vera að íhuga að senda bandaríska hermenn til vesturhluta Úkraínu, þar sem þeir myndu koma að því að þjálfa úkraínska hermenn. Það yrði gert í stað þess að senda þá til herbúða í Þýskalandi.

Biden hefur hingað til ekki viljað senda hermenn til Úkraínu en verði það gert vekur það upp spurningar um hvernig Bandaríkjamenn myndu bregðast við því ef bandarískir hermenn féllu í árásum Rússa. Rússar gera ekki oft árásir á vesturhluta Úkraínu en það gerist þó.

Meiri skotfæri á víglínunni

Reuters sagði frá því á dögunum að ný skotfæri frá Bandaríkjunum hefðu borist á víglínuna í Úkraínu og að stórskotalið Úkraínu ætti ekki lengur í vanda vegna mikils skorts sem þeir hafa þurft að eiga við á undanförnum mánuðum.

Blaðamaður Reuters ræddi meðal annars við hermenn sem tóku þátt í bardaganum um Bakmút í fyrra en þeir sögðu átökin í Karkív vera harðari en átökin um Bakmút.

„Það er mun „heitara“ hér. Við höfðum ekki skotfærin þar. Hérna höfum við í það minnsta sprengikúlur, þær eru byrjaðir að berast. Við höfum eitthvað til að vinna með, til að berjast,“ sagði einn hermannanna.

Á kortunum frá bandarísku hugveitunni Institute for the study of war má sjá hvernig staðan í Úkraínu er þessa dagana og hvar helstu bardgararnir eiga sér stað.