Segir gamlan vin valda sér von­brigðum

Bjarni tók Kveiksþáttinn fyrir á Facebook-síðu sinni í gærkvöldi og sagði hann þáttinn hneyksli. Sigmar tók þá málið fyrir í ræðu á Alþingi og sagði hann stórgóðan, hið raunverulega hneyksli væru viðbrögð Bjarna.

„Enn heldur minn ágæti gamli vinur, Sigmar Guðmundsson, áfram að valda mér vonbrigðum með málflutningi sínum,“ skrifar Bjarni í nýrri Facebook-færslu. Þar segir hann þáttinn fá falleinkunn frá sér.

Hann segir sorglegt að íslenska krónan hafi orðið að blóraböggli fyrir krefjandi aðstæður í efnahagi landsins.

Bjarni nefnir aðra þætti líkt og framboð af húsnæði, stríð, orkukreppu, og erfiðleika í kjara- og vinnumarkaðsmálum. „Þessi viðfangsefni hverfa ekki með öðrum gjaldmiðli,“ fullyrðir hann.

RÚV megi ekki vera yfir gagnrýni hafið

Bjarni minnist á að Viðreisn hafi ítrekað reynt að koma evrunni og aðild að Evrópusambandinu að, en án árangurs. Þá skýtur hann á Sigmar, sem starfaði í tvo áratugi rúma hjá RÚV, sem og aðra starfsmenn stofnunarinnar, sem hann segir eiga erfitt með að sjá hana gagnrýnda.

„Sigmar ætti e.t.v. að taka upp samtal við fólkið í landinu að nýju í stað þess að hneykslast á því að ég hafi skoðun á umfjöllun Ríkisútvarpsins. Hann biður um rök fyrir gagnrýni minni líkt og hann sé enn starfsmaður Ríkisútvarpsins. Þeir eru allnokkrir núverandi og fyrrverandi starfsmenn sem sjá rautt ef orði er hallað á þessa stofnun sem við þó eigum öll saman. Hún er hvorki eign núverandi né fyrrverandi starfsmanna. Og má aldrei vera yfir gagnrýni hafin.“

Í erindi sínu á Alþingi í dag fullyrti Sigmar að Bjarni hefði ekki bent á neina staðreyndavillu varðandi þátt Kveiks. Bjarni biður hann um að lesa færslu sína á ný og minnist á umræðu sem var á Alþingi árið 2002 um hvort fyrirtæki ættu að mega að gera upp í erlendri mynt.

„Sigmar segir mig ekki benda á staðreyndavillur. Ég bendi honum á að lesa færslu mína að nýju og velta fyrir sér hvort það sé í alvöru óeðlilegt sé að fyrirtæki með meginþorra tekna sinna í erlendri mynt fái að gera upp í þeirri mynt. Auðvitað er það sjálfsagt mál og formaður Viðreisnar greiddi því atkvæði árið 2002 á Alþingi. Er reyndar eini þingmaðurinn á Alþingi sem tók þátt í þeirri atkvæðagreiðslu og var ekki í vafa þá. Ég hvet alla, ekki síst Kveiksfólk, að lesa alla þá umræðu, nefndarálitin og ræðurnar sem fluttar voru,“ segir Bjarni og spyr:

„Í Kveiksþættinum var gefið í skyn að heimilin ættu skilið að fá lágu evruvextina án þess að rætt væri með eðlilegum hætti um gengisáhættuna af slíku hættuspili. Þarf virkilega að ræða þetta eitthvað frekar eftir allt sem við höfum upplifað á öldinni í þeim efnum?“

Gefur þættinum falleinkunn

Að lokum segir Bjarni að endanlegur mælikvarði á hagstjórn og efnahagsmál séu kjör fólksins í landinu.

„Við Íslendingar höfum allt sem til þarf til að takast á við verðbólguna og endurheimta stöðugleika og lægri vexti,“ segir hann og bætir við að það verði eflaust ekki auðvelt og gerist ekki án fórna. „Þeir sem boða lausnir sem ekkert þarf að hafa fyrir eru enda almennt lýðskrumarar og tækifærissinnar.“

Hann fullyrðir að ekki þurfi nýjan gjaldmiðil til að tryggja stöðugleika og að með upptöku evru kæmu nýjar áskoranir.

„Ekkert af þessu kom fram í slökum Kveiksþætti Ríkisútvarpsins í gær. Þar skorti allt heildarsamhengi hlutanna og þátturinn fær þess vegna falleinkunn hjá mér,“ segir hann.