Vill að dómarinn stígi til hliðar

Chutkan er yfir máli Jacks Smith, sérstaks rannsakanda dómsmálaráðuneytisins, sem hefur ákært Trump fyrir að reyna að snúa úrslitum forsetakosninganna 2020, sem hann tapaði fyrir Joe Biden.

Verjendur Trumps vísa máli sínu til stuðnings til ummæla Chutkan við réttarhöld gegn tveimur mönnum sem voru dæmdir fyrir að taka þátt í því að ryðjast inn í þinghús Bandaríkjanna þann 6. janúar 2021. Það gerðu stuðningsmenn Trumps með því markmiði að koma í veg fyrir formlega staðfestingu úrslita kosninganna í nóvember 2020.

Við dómsuppkvaðningu í öðru málinu sagði Chutkan að múgurinn sem réðst á þinghúsið hefði sýnt „einum manni blinda hollustu, sem gengi enn laus“.

Í hinu málinu sagði Chutkan við mann sem var dæmdur fyrir að kasta slökkvitæki í lögregluþjóna að „fólkið sem hefði „eggjað og hvatt“ hann og aðra „hefði ekki verið ákært“.

John F. Lauro, einn lögmanna Trumps, skrifaði undir þessa kröfu, samkvæmt frétt New York Times, en hann segir að ummæli Chutkan, sem eru frá því áður en Trump var ákærður, sýni að hún geti ekki setið yfir réttarhöldunum.

Lauro segir að jafnvel þó Chutkan sýni fullkomna sanngirni í garð Trumps muni ummælin koma niður á réttarhöldunum og gefa þá mynd að honum hafi ekki verið sýnd sanngirni.

Sögð refsigjörn

Chutkan var skipuð í embætti alríkisdómara af Barack Obama og hefur dæmt nokkra menn sem komu að árásinni að þinghúsinu. Hún er sögð hafa veitt þeim harða refsingu en nokkra hafur hún dæmt í lengra fangelsi en saksóknarar fóru fram á.

Chutkan hefur ítrekað beint því til lögmanna Trumps að ummæli hans á samfélagsmiðlum séu ekki við hæfi en það hefur engan árangur borið. Hann hefur ítrekað tjáð sig um málaferlin gegn honum og um hana sjálfa. 

Saksóknarar hafa samkvæmt AP fréttaveitunni lýst yfir áhyggjum af því að ummæli Trumps um réttarhöldin og Chutkan séu þegar byrjuð að koma niður á þeim og muni mögulega koma niður á því þegar kemur að því að velja kviðdómendur.

Í ákærunni gegn honum segir að Trump hafi rétt til þess að tala um kosningarnar og jafnvel til að segja ósatt og halda því fram að hann hafi unnið. Þá hafi hann einnig haft rétt á því að beita löglegum leiðum til að krefjast endurtalninga og rannsókna eftir kosningarnar og það hafi hann gert.

Þar segir að hann hafi þó ekki rétt til að beita ólöglegum leiðum og bellibrögðum til að snúa úrslitunum. Saksóknarar segja einnig að viðleitni Trumps hafi brotið gegn grunni lýðveldis í Bandaríkjunum.

Ákæran snýr ekki eingöngu að lygum hans um úrslit kosninganna heldur einnig tilraunir hans og bandamanna hans til að skipta út réttkjörnum kjörmönnum í sjö ríkjum.

Fjögur réttarhöld á næstunni

Trump sækist aftur eftir tilnefningu Repúblikanaflokksins til forsetakosninanna í nóvember á næsta ári og er lang líklegastur til að hljóta hana, miðað við kannanir.

Hann stendur frammi fyrir fjórum ákærum um þessar mundir og hefur áður reynt að fá dómara til að stíga til hliðar. Það tókst ekki. Chutkan sjálf mun fyrst taka kröfuna fyrir og annað hvort hafna henni eða verða við henni.