Al­gjör ó­vissa um stöðu trygginga­taka: „Við höfum haft á­hyggjur af þessu fé­lagi lengi“

Seðlabankinn tilkynnti í gær að frá og með 5. júní væri Novis óheimilt að stunda vátryggingastarfsemi, að undanskilinni þeirri starfsemi sem nauðsynleg er til þess að framfylgja kröfum félagsins og gera upp skuldbindingar þess. Í þessu felst að Novis er óheimilt að stofna til nýrra samninga.

Novis er líftryggingafélag sem hóf starfsemi árið 2014 í Slóvakíu og lýtur eftirliti NBS. Auk starfsemi í heimaríkinu, hefur Novis selt vátryggingaafurðir í gegnum útibú í Austurríki, Tékkandi og Þýskalandi og án starfsstöðvar í Finnlandi, Litháen, Póllandi, Svíþjóð, Ungverjalandi, á Ítalíu, og Íslandi.

Ásgeir Jónsson Seðlabankastjóri ræddi málið við Heimi Má Pétursson fréttamann í morgun:

„Þetta er félag sem er gert út frá Slóvakíu í gegnum evrópska vegabréfakerfið, svo það er slóvakíski seðlabankinn sem á að hafa eftirlit með því. Við höfum haft áhyggjur af þessu félagi lengi, og höfum meðal annars birt viðvaranir á heimasíðu Seðlabankans, allavega síðustu tvö, þrjú árin og nú er komið að því að þessu félagi hefur verið lokað og við höfum stöðvað starfsemi og sölu á afurðum frá þessu félagi núna,“ segir hann.

Gera sér ekki grein fyrir stöðu sex til sjö þúsund viðskiptavina

Samkvæmt heimildum fréttastofu hafa um sex til sjö þúsund Íslendingar keypt tryggingarafurðir Novis í gegnum Tryggingar og Ráðgjöf. Ásgeir segir að Seðlabankinn geri sér ekki að fullu grein fyrir stöðu þeirra.

„Það eiga að vera eignir í þessu félagi sem standa undir þeim skuldbindingum sem hefur verið stofnað til. Við vitum ekki nákvæmlega hver staða þeirra er. Þetta er eitthvað sem við höfum tekið upp hvað eftir annað á hinum evrópska vettvangi,“ segir Ásgeir.

Ásgeir segist ekki geta fullyrt neitt um stöðu þeirra sem eiga tryggingakröfur á hendur félaginu, hafa greitt iðgjöld eða eiga séreignarsparnað hjá félaginu. Óvissan sé hængur á evrópska fjármálaeftirlitskerfinu

„Allir íslenskir aðilar sem eru hérna, sem eru undir okkar eftirliti, við náttúrulega gætum að þeim. Við erum með eftirlit með öllum þeim sem eru að selja tryggingar eða viðbótarlífeyrissparnað og svo framvegis. En það eru þessi vandræði, þegar það eru aðilar sem koma að utan, undir eftir eftirliti annars staðar og samkvæmt hinu evrópska kerfi eigum við að treysta þessu eftirliti sem er þar. En í þessu tilviki höfum við haft miklar efasemdir um að það væri nægilega öflugt,“ segir Ásgeir.

Segir mikilvægt að fólk hlaupi ekki til og segi upp samningum

Hákon Hákonarson, stofnandi og stjórnarmaður Trygginga og ráðgjafar, sem er stærsti söluaðili tryggingaafurða Novis hér á landi, segir að samkvæmt þeim upplýsingum sem fyrirtækið hafi fengið frá Novis séu eignir þess séu nægar til þess að standa undir skuldbindingum þess.

Þá sé ekki víst að félagið fari í slitameðferð. Seðlabanki Slóvakíu hafi aðeins farið fram á það að svokallaður liquidator verði skipaður yfir félagið til þess að fara yfir eignir og skuldbindingar þess, það sé ekki eiginlegur slitastjóri, líkt og greint hefur verið frá. Þá hafi félagið þegar tilkynnt að það muni kæra ákvörðun seðlabankans.

„Það er alls ekki þannig að Novis standi á barmi gjaldþrots og að allir séu stokknir frá skútunni,“ segir Hákon í samtali við Vísi.

Þá segir hann að mikil óvissa sé uppi um afdrif Novis, hvorki Tryggingar og ráðgjöf né seðlabankinn, viti meira en þegar hefur verið þýtt af ákvörðun slóvakíska seðlabankans, en greinargerð hans sé 180 blaðsíður af lagatexta á slóvakísku. Aðeins brot af því hafi verið þýtt og aðeins einn maður, lögmaður Novis ytra, hafi lesið allan textann.

Vegna óvissunar, og þeirrar staðreyndar að tvær vikur séu í næstu iðgjaldaafborgun, segir Hákon mikilvægt að viðskiptavinir hlaupi ekki til og segi upp vátryggingarsamningum sínum. Fólk geti þá jafnvel lent í því að vera orðið ótryggjanlegt frá því að það keypti líftryggingar frá Novis.

Í fréttatilkynningu slóvakíska seðlabankans um afturköllun starfsleyfis Novis er farið yfir ferlið við slitameðferð og úrræði vátryggingartaka og kröfuhafa.

Samningar haldi, nema þeir sem ekki hafa verið samþykktir

Hákon segir að leyfissvipting Novis í Slóvakíu snúi aðeins að gerð nýrra tryggingasamninga. Því haldi þegar gerðir samningar gildi sínu og til að mynda sé enn hægt að sækja vátryggingarbætur til félagsins og Tryggingar og ráðgjöf muni áfram sjá um innheimtu þeirra.

Hins vegar sé staðan þannig að samningar um kaup trygginga í gegnum Tryggingar og ráðgjöf, sem hafa ekki verið samþykktir af Novis í Slóvakíu, muni ekki öðlast gildi.

Þá furðar Hákon sig á orðum Seðlabankastjóra þess efnis að Seðlabankinn hafi bannað sölu nýrra trygginga hér á landi.

„Við erum aðaldreifingaraðilinn hér á landi og við erum ekkert að selja samninga áfram sem ekkert verður af. Það er bara sjálfhætt,“ segir hann.