Lést á flug­vellinum þar sem hann dvaldi í á­tján ár

Nasseri var strandaglópur á flugvellinum í rúmlega átján ár eftir að hafa verið synjað um landvistarleyfi vegna skorts á skilríkjum árið 1988. Árið 1999 fékk hann stöðu flóttamanns og landvistarleyfi í Frakklandi. Samt sem áður bjó hann áfram í flugstöðinni um nokkurt skeið.

Hann hafði farið frá Íran í ferðalag vítt og breitt um Evrópu í leit að móður sinni en fékk hvergi að vera.

Árið 2004 gerði Steven Spielberg kvikmyndina The Terminal sem var byggð að stórum hluta á sögu Nasseris. Þar fer Tom Hanks með hlutverk manns sem situr fastur á JFK-flugvellinum í New York eftir að vegabréf hans rann úr gildi.

Speilberg keypti sögu Nasseris af honum fyrir dágóðar fjárhæðir, allavega fyrir mann sem hafði setið fastur á flugvelli á nokkurrar atvinnu. Árið 2006 nýtti hann þá fjármuni til þess að flytja loksins af flugvellinum, sem hafði verið heimili hans í rúm átján ár. 

AFP-fréttaveitan hefur eftir starfsmanni flugvallarins að Nasseri hafi snúið aftur á flugvöllinn fyrir nokkrum vikum eftir að hafa orðið blankur á ný. Á líki hans hafi samt sem áður fundist nokkur þúsund evrur.

Nasseri var fæddur árið 1945 og því 77 ára að aldri þegar hann lést af náttúrulegum orsökum á flugvellinum.