Vilja fá fleiri sveitarfélög að borðinu svo hægt sé að sinna fólki vel

Vésteinn Örn Pétursson skrifar 25. ágúst 2022 06:31

Þær Halldóra (t.v.) og Guðný segja að sveitarfélagið vilji áfram sinna málaflokknum. Það þurfi hins vegar að gera vel. Til að svo megi vera þurfi aukið fjármagn og aðkomu fleiri sveitarfélaga. Vísir/Arnar

Meirihluti sveitarstjórnar Reykjanesbæjar er ósáttur við þrýsting ríkisins á sveitarfélagið um að taka á móti fleira flóttafólki og fólki í leit að vernd, án þess að fjármagn fylgi. Að sama skapi gagnrýnir meirihlutinn að ríkið hafi tekið á leigu húsnæði fyrir yfir fjögur hundruð manns á Ásbrú, án þess að ræða við sveitarfélagið.

Í yfirlýsingu meirihluta bæjarstjórnarinnar, sem lesa má í heild sinni hér að neðan, segir að Reykjanesbær vilji hlúa sem best að fólki á flótta, enda sé hann eitt þriggja sveitarfélaga sem komi að samningi um móttöku einstaklinga í leit að alþjóðlegri vernd, ásamt Reykjavík og Hafnarfirði. Þannig sinni bærinn samfélagslegri skyldu sinni, en ríkið þrýsti engu að síður á að tekið verði á móti fleira fólki.

„Nú eru eitt þúsund manns í leit að alþjóðlegri vernd, og yfir fimm hundruð af þeim eru á Suðurnesjum. Það er svolítið það sem við höfum verið að leggja áherslu á, og gerðum það líka á síðasta kjörtímabili, að við viljum að það komi fleiri sveitarfélög að þessu verkefni,“ segir Halldóra Fríða Þorvaldsdóttir, forseti bæjarstjórnarinnar.

Ein leiðin geti verið að setja reglugerð um að sveitarfélög á höfuðborgarsvæðinu taki við ákveðnum fjölda fólks miðað við íbúafjölda þeirra, en viðbrögð við þeirri tillögu sveitarfélagsins hafi staðið á sér.

Þá þurfi að sporna við einangrun þeirra sem sveitarfélögin taka á móti, svo koma megi í veg fyrir fordóma í samfélaginu.

„Dreifa þeim á milli hverfa, milli skóla, milli leikskóla, þannig að við séum ekki með einhverja þyrpingu. Í þessum fasa, hjá þessum ríkisstofnunum, þá er verið að taka á leigu blokkir og öllum safnað saman í sama hóp, sem mun ekki leiða til lykta góða útkomu til lengdar,“ segir Guðný Birna Guðmundsdóttir varaforseti.

Þá þurfi að dreifa álaginu á milli sveitarfélaga, innviðanna vegna. Allt frá leikskólum upp í heilbrigðisstofnun Suðurnesja.

„Það er ein af okkar meginástæðum, af hverju við teljum okkur ekki geta tekið við fleirum. Af því að þetta fjármagn í innviðina okkar fylgir ekki með,“ segir Guðný.

Ef brugðist verði við áhyggjum sveitarfélagsins megi sinna flóttafólki og fólki í leit að vernd mun betur.

„Þetta er ekki verkefni sem við viljum hætta að sinna. Við viljum halda því áfram og gera það vel. Við viljum bara að fleiri komi að borðinu,“ segir Halldóra að lokum.

Yfirlýsing meirihlutans í heild sinni er hér að neðan:

Samband Útlendingastofnunar og Vinnumálastofnunar við Reykjanesbæ

Reykjanesbær hefur um árabil verið með samning um móttöku einstaklinga í leit að alþjóðlegri vernd. Þessu höfum við sinnt af kostgæfni og alúð enda samfélagslega mikilvægt verkefni. Við höfum leitast við að tryggja dreifða búsetu í sveitarfélaginu og reynt eftir bestu getu að hlúa að aðlögun fólks á flótta í samfélaginu. Reykjavík og Hafnarfjörður eru einnig með slíkan samning en fleiri sveitarfélög hafa ekki verið tilbúin að taka á móti einstaklingum í leit að vernd.

Auk þessa verkefnis hefur Reykjanesbær ásamt Akureyri, Árborg, Hafnarfirði og Reykjavík tekið við stórum hóp flóttafólks í gegnum samræmda móttöku flóttafólks.

Að okkar mati erum við að sinna okkar samfélagslegu skyldum og það viljum við gera almennilega. Þrátt fyrir það hefur Útlendingastofnun (sem fór með málaflokkinn þar til nýlega) og nú Vinnumálastofnun ýtt sterklega á sveitarfélagið á að taka við fleiri einstaklingum og stækka samninginn. Þessu höfum við ítrekað neitað undanfarin ár með eftirfarandi rökum:

1. Við erum þegar að sinna umræddu verkefni og erum með samninga sem teljast vera stórir fyrir tæplega 22.000 manna sveitarfélag.

2. Með auknum fjölda flóttafólks þykir okkur eðlilegt að aukið fjármagn fylgi einnig til styrktar grunnstoðum og innviðum sem eru komin að þolmörkum líkt og til Heilbrigðisstofnunar Suðurnesja, fyrir sálfræðiþjónustu, til ráðningar á starfsfólki í leik- og grunnskóla, í löggæslu og sjúkraflutninga. Slíkt hefur ekki fylgt en reynslan sýnir að slík þjónusta er grundvöllur þess að vel takist.

3. Ekki er talið ásættanlegt að ríkisstofnun hafi á leigu húsnæði í einu og sama hverfinu þar sem mörg hundruð einstaklingar eru búsettir sem ekki eru í þjónustu sveitarfélagsins heldur er þjónustan á vegum ríkisins.

Þar sem fjármagn til grunnstoða samfélagsins fylgir ekki skiljum við ekki af hverju umræddar ríkisstofnanir hafa, þrátt fyrir ítrekaðar beiðnir um annað, komið sér upp leiguhúsnæði sem rúmar á fimmta hundrað einstaklinga á flótta í Ásbrúarhverfi umfram þá um 270 sem sveitarfélagið þjónustar. Það er algjörlega ótækt að samráð ríkis og sveitarfélags sé ekki betra og að ekki séu tekin til greina málefnaleg rök sem borist hafa frá Reykjanesbæ.

Lykillinn að áframhaldandi farsælu starfi í þessum málaflokki felst í vönduðum og vel ígrunduðum vinnubrögðum öllum til heilla. Þessi vinnubrögð eru algerlega forkastanleg og benda ekki til mikils samstarfsvilja né virðingar gagnvart íbúum og ekki síst þeim sem hingað leita skjóls.

Í okkar huga er aðeins ein lausn í málinu sem við höfum rætt margsinnis áður. Hún er að reglugerð verði lögð fram um að sveitarfélög á stórhöfuðborgarsvæðinu taki við ákveðnum fjölda einstaklinga miðað við íbúafjölda hvers þeirra. Ljóst er að þetta gengur ekki lengur með núverandi skipulagi.

Meirihluti bæjarstjórnar Reykjanesbæjar

Reykjanesbær Félagsmál Flóttamenn Flóttafólk á Íslandi Hælisleitendur

Mest lesið

Fleiri fréttir