Fjögurra til átta stiga hiti í dag

Vésteinn Örn Pétursson skrifar 21. nóvember 2021 07:38

Líklegt má telja að þessi álft, sem og aðrar sem halda til við Reykjavíkurtjörn, geti fengið sér sundsprett í tjörninni í dag. Hitinn verður nefnilega yfir frostmarki og aðstæður til tjarnarsunds því með besta móti. Vísir/Vilhelm

Búast má við suðvestanátt í dag, yfirleit tíu til fimmtán metrum á sekúndu. Hvassast verður á norðanverðu landinu og á Öræfum, um fimmtán til tuttugu metrar, en snjókoma til fjalla. Ökumenn á Öxnadalsheiði gætu þá lent í vandræðum vegna hríðarveðurs. Á Austurlandi verður skýjað en úrkomulítið og hiti á landinu á bilinu fjögur til átta stig.

Þetta kemur fram í hugleiðingum veðurfræðings á vef Veðurstofu Íslands. Þar segir að á morgun megi búast við svipuðu veðri með hvassri suðlægri átt og rigningu vestan- og sunnanlands, en slyddu til fjalla. Þurrara verður á Austurlandi og hiti breytist lítið.

Á þriðjudag verður þá mun hægari norðlæg átt með éljum víða, en minni úrkomu á suðausturhluta landsins. Þá kólnar í veðri.

Í framhaldinu er spáð umhleypingum með slyddu eða snjókomu víða um land og kólnandi veðri.

Veðurhorfur á landinu næstu daga:

Mánudagur:

Suðvestan 13-20 m/s og rigning, hvassast NV-til og með SA-ströndinni, en úrkomulítið A-lands. Hiti 3 til 8 stig. Hægari og skúrir eða él V-til um kvöldið og kólnar.

Þriðjudagur:

Snýst í norðan 8-13 m/s með snjó- eða slydduéljum á N-verðu landinu og rignningu eða snjókomu sunnantil. Hiti yfirleitt kringum frostmark, en 0 til 4 stig við suðurströndina.

Miðvikudagur:

Hvöss norðanátt með snjókomu eða éljum í fyrstu, en lægir smám saman og léttir til, fyrst V-lands. Frost 0 til 8 stig, kaldast inn til landsins.

Fimmtudagur:

Suðlæg átt með rigningu eða snjókomu víða. Norðlægari seinnipartinn við éljum fyrir norðan, en léttir til fyrir sunnan. Fremur svalt í veðri.

Föstudagur:

Norðlæg átt, dálítil él á víð og dreif og talsvert frost um land allt.

Laugardagur:

Útlit fyrir ákveðna norðanátt með éljum á norðan- og austanverðu landinu, en þurrt að kalla suðvestantil. Hiti breytist lítið.

Veður