Vara við til­raunum á auð­kennis­þjófnaði í nafni Borgunar

Borgun/SaltPay hefur varað við yfirstandandi tilraunum á auðkennisþjófnaði í nafni Borgunar. Einhverjir hafa lent í því að fá sms-skilaboð í nafni Borgunar, en um er að ræða falska SMS-tilkynningu um að viðkomandi þurfi að staðfesta símanúmer og skrá sig inn með rafrænum skilríkjum í tengslum við raðgreiðslur. Þetta er ekki raunin.

Þetta kemur fram í tilkynningu frá Borgun/SaltPay. Þar segir að aldrei sé beðið um tilefnislausar beiðnir um staðfestingu rafrænna skilríkja eða stafestingu á símanúmeri í gegn um sms eða með símtali.

„Einstaklingum sé ráðlagt að opna skilaboðin og tölvupóstana ekki, smella alls ekki á hlekkinn sem fylgi með og allra síst gefa upp kortaupplýsingar. Best sé að eyða skilaboðunum strax.

Hafi fólk brugðist við skilaboðunum er mælt með því að umsvifalaust samband við þjónustuver Borgunar/SaltPay í síma 560 1600. Tekið skal skýrt fram að Borgun hetur ekki orðið fyrir tölvuárás heldur er um að ræða svikatilraun þar sem nafn og merki fyrirtæksins er notað í blekkingarskyni.

Þá hefur málið verið tilkynnt lögregluyfirvöldum, netöryggissveit Póst- og fjarskiptastofnunar og helstu þátttakendum í öryggissamstarfi fjármálastofnana um áðurnefndar tilraunir til svika.“