„Megi þeim ganga sem best að standa af sér orkuskiptin“

„Það er tilkomumikið nýja skiltið á Ísafirði sem auglýsir skítódýrt eldsneyti á útlensku. Aðeins 227,5 krónur hver lítri takk fyrir. Svo er líka hægt að keyra 15 kílómetra til Bolungarvíkur og fá sama sopa á 232,5 kr. Ótrúlega cheap díll til handa Vestfirðingum,“ segir Guðmundur háðslega í Facebookfærslu.

Hann birtir mynd af bensínstöð Orkunnar þar sem getur að líta flennistórt skilti þar sem stendur: „Cheap fuel in Iceland“. Guðmundur bendir á að sama varan, frá sama fyrirtæki, fáist reyndar á 193,3 krónur við Dalveg í Kópavogi. „Ekki nema 40 krónum ódýrari. Sá díll er reyndar á íslensku. Hver tankur einhverjum þúsundköllum ódýrari. Samt ekki cheap.“

Vestfirðingar grátt leiknir

Bæjarstjórinn fyrrverandi beinir orðum sínum til Facebookvina sinna og áhugafólks um neytendamál: „Hugsið ykkur, á sama bílaplani á Ísafirði er hægt að kaupa matvöru á sama verði og í Reykjavík. Hvernig sem á því stendur.“

Guðmundur telur að það hljóti þá að gilda einhver allt önnur lögmál um flutningskostnað á mjólk en bensíni. Hann segist ekki þekkja það. En klykkir út með írónískri kveðju til Orkufólksins:

„Endemis hugulsemi alltaf hreint hjá þessu olíufólki. Megi þeim ganga sem best að standa af sér orkuskiptin.“

Ljóst er að Guðmundur, sem er kominn í framboðsgír, hefur hitt á taug því mikil umræða um pistil hans hefur myndast í athugasemdum. Ýmsir valinkunnir Vestfirðingar hafa lýst sig heils hugar sammála þessari þörfu ábendingu; margir telja landsbyggðafólkið grátt leikið og þá ekki síst Vestfirðingar: „Glæpur, ekkert annað,“ segir einn. Annar telur að skiltið skelfilegt: „Þetta hræðilega skilti hefði líka átt að fara í grenndarkynningu.“

Vandamálið ekki bara bundið við Vestfirðinga

Þó er einn, Magnús Magnússon sem starfar á auglýsingastofunni Peel og býr í Garðabæ, sem vill gjalda varhug við þeirri mynd sem dregin er upp af raunum landsbyggðarinnar: „Er ekki eldsneyti líka dýrara á höfuðborgarsvæðinu því lengra sem þú ferð frá Costco? Þú ert að bera verðið saman við einu Orku stöðvarnar sem eru ódýrari... allar aðrar í borginni eru með sama verð.“

En ábending Magnúsar fellur ekki kramið meðal Vestfirðinga, síst hjá málshefjanda sem spyr með þjósti: „Hvað með það? Af hverju eru kasjú hneturnar ekki dýrari því lengra sem ég ek frá Garðabæ? Öll olíufélögin eru með stöðvar fyrir vestan. Þar ættu líka að gilda lögmál um samkeppni. Nú eða samráð.“

Magnús segist skilja punkt Guðmundar en vandamálið sé ekki tengt Vestfjörðum eða öðrum svæðum. „Ef ég ákveð að horfa bara til bensínstöðva í Breiðholti get ég sagt það nákvæmlega sama og þú um Vestfirði. Vandamálið er almennt og sýnir að bensínstöðvar eru hvergi í alvöru samkeppni nema við Costco.“