Sjokk að greinast með Covid-19 og missa af fæðingunni

Símon Geirs, lögregluþjónn á Suðurlandi, smitaðist af rúmenskum ferðamönnum sem hann þurfti að hafa afskipti af í starfi. Símon segir þetta gríðarlegt áfall en þakkar fyrir að eiga að gott samfélag og gott embætti. Símon er búsettur á Selfossi en lögregluembættið hefur útvegað hinum 35 ára gamla lögreglumanni húsnæði þar sem hann dvelur nú í sóttkví. Símon segir lykilatriði að smita ekki fleiri nú þegar unnið er að því að ná niður þessu smiti sem kom upp nýverið.

Símon segir heilsuna sæmilega, einhver höfuð- og kviðverkir sem fylgja en ekkert til að hafa orð á. Heilt yfir sé hann fínn. Stærsta áfallið er það að geta ekki verið með konu sinni sem er með barni. Hún er genginn 39 vikur. Hann missir af mikilvægum tíma meðgöngunnar en þetta er þeirra fyrsta barn saman en þriðja hans.

Óbærilegt að missa af meðgöngunni

„Drengurinn minn að útskrifast af leikskóla. Ég missi af því sem er grautfúlt. Það eru þessir hlutir í lífinu sem eru svo mikilvægir og maður kann betur að meta núna. 

Það er grautfúlt að geta ekki verið í kringum fjölskylduna sína. Upplifa sig í útlegð. En, númer eitt tvö og þrjú er erfitt að geta ekki verið með konunni sinni sem er að ganga í gegnum þetta ferli. Hún er gengin svo langt. Þetta er sjokk. Hún er sett í næstu viku. Það er það versta við þetta,“ segir Símon og bætir því við að þetta sé eins og að fara í gegnum sorgarferli.“

Símon hafði verið úrskurðaður í tveggja vikna sóttkví og stefndi á að klára það ótrauður þegar hann fékk tíðindin um að hann hefði greinst með smit sjálfur.

„Það var áfall að heyra það í gær. Heimurinn hrundi. Áfall á áfall ofan. Ég var kominn í hátíðarbúninginn. Uppstrílaður og flottur. Ég lauk diplómunámi í lögreglufræðum og varð því löggiltur lögreglumaður sama dag og ég þurfti að fara í sóttkví. Var á leið í útskriftina. En fór þess í stað í sóttkví.“

Útkall vegna hnupls í búð á Selfossi

Málið sem leiddi til þess að Símon smitaðist hefur orðið að fréttaefni. Það tengist smituðum ferðamönnum frá Rúmeníu sem ekki virtu tilmæli um að þeim bæri að fara í sóttkví. Vísir bað Símon um að lýsa tildrögunum.

Símon segir að hann og félagi hans hafi fengið útkall í gegnum fjarskiptastöð ríkislögreglustjóra fyrir viku.

„Að það eigi sér stað einhvers konar hnupl í verslun á Selfossi. Við sinnum því útkalli, förum í það strax og ræddum við eiganda búðarinnar sem gaf okkur lýsingu á einstaklingunum sem um ræddi.“

Fóru og sóttu hina meintu brotamenn

Seinna kom í ljós að Lögreglan í Reykjavík hafði haft afskipti af þessum sömu einstaklingum en þá lá fyrir lýsing á bíl, bílnúmer og nánari lýsing á þeim einstaklingum sem um ræðir. Símon segir að þeir hafi fengið lögregluna til að halda þeim.

„Við fórum og sóttum þá. Við gerum okkur grein fyrir því að þeir séu kannski af erlendu bergi brotnir en við töldum þetta einstaklinga sem hafa verið á landinu allan tímann. Við vissum ekki þá að þeir voru nýkomnir til landsins. Við héldum að landamærin væru lokuð. Við fórum og ræddum við einstaklingana. þá vaknar grunur um að þeir séu nýkomnir til landsins. Og þá fór fram skimun.“

Eins og fram hefur komið í fjölmiðlum var um þrjá einstaklinga að ræða og reyndust tveir þeirra vera smitaðir af Covid-19. Heilt yfir eru það 14 lögreglumenn, bæði frá Suðurlandi og Reykjavík, sem höfðu afskipti af mönnunum og eru þeir allir í sóttkví.

Kórónuveiruhættan kom flatt uppá lögregluþjónana

„Við fórum á tveimur bílum, fjórir lögreglumenn frá Suðurlandi til að sækja þá. Svo eru fleiri sem hafa afskipti af þeim. Og svo túlkurinn sem þarf vera í herbergi með smituðum einstaklingum til að túlka.“

Símon segir að allir sem að komu í byrjun hafi staðið í þeirri meiningu að Ísland væri komið úr kórónuveirustöðunni.

„Að við værum að koma út úr þessari hrotu. Héldum að landamærin okkar væru lokuð og það væri miðað við 15. júní,“ segir Símon. Og því var það að lögreglumennirnir fóru í útkallið grandalausir um hina yfirvofandi hættu.

„Þetta kom okkur í opna skjöldu. Í ljósi þess að þarna voru menn sem ekki höfðu virt það að fara í sóttkví eins og sóttvarnarlög gera þó ráð fyrir var tekin ákvörðun um að skima. Og það kemur í ljós að tveir af þremur eru smitaðir. Þá förum við í sóttkví.“

Mikill meðbyr sárabót fyrir kröpp kjör

Þó staðan sé þröng, í raun grátleg segir Símon mikinn meðbyr og kveðjur hafa sitt að segja, sem þau sem í framlínusveit lögreglunnar fá nú í miklum mæli.

„Við erum framlínusveit lögreglan og vinnum eftir heilindum, viljum þjónusta borgara og við finnum mikinn meðbyr. Ég er rosalega ánægður með það hvað fólk í samfélaginu hefur sent okkur fallegar kveðjur. Og styður okkur. Oft er erfitt að vera lögreglumaður og horfa í launaseðilinn sinn. En ég vona að þetta verði þá til þess að ríkið horfi á okkur sem verkamenn sem eru vel að launum okkar komnir.“