Telur íslensk yfirvöld velja varfærnari leið en aðrar þjóðir

Jóhannes Þór Skúlason, framkvæmdastjóri Samtaka ferðaþjónustunnar, segir ferðaþjónustuaðila hafa vonast eftir því að samræmi yrði milli landa varðandi reglur um komu ferðamanna. Ríkisstjórnin stefnir á að hefja skimun fyrir veirunni á Keflavíkurflugvelli 15. júní næstkomandi.

Í minnisblaði sóttvarnalæknis til heilbrigðisráðherra útilokaði hann aðra kosti um takmarkanir á komu ferðamanna til landsins. Algjör opnun eða lokun landamæranna kæmi ekki til greina að hans mati, og þá væri heilsufarsskoðun fyrir eða við komu til landsins of kostnaðarsöm og ólíkleg til árangurs. Þá falla niðurstöður úr mótefnamælingu ekki undir heilsufarsskoðun.

Val um skimun eða fjórtán daga sóttkví væru því bestu kostirnir, eða framvísun vottorðs sem þykir jafngilda skimun.

„Þetta er vandmeðfarið samspil heilbrigðisþátta og efnahagsþátta sem á sér núna stað um alla álfuna. Það er orðinn mikill þrýstingur á að það opnist á ferðalög aftur, ég tala nú ekki um frá til dæmis ríkjum sem eiga mikið undir ferðaþjónustunni eins og við Miðjarðarhafið og hérna norður í Atlantshafinu,“ segir Jóhannes Þór í samtali við fréttastofu.

„Við höfum verið að horfa til þess að vonandi yrðu þessar reglur einhvern veginn eins samræmdar og hægt væri, en eins og komið hefur fram er engin alþjóðleg samvinna beinlínis um það.“

Samtök ferðaþjónustunnar telji leið íslenskra yfirvalda vera varfærnari en þær leiðir sem mörg önnur ríki heimsins kjósi að fara. Það verði því áhugavert að sjá hvernig þessi útfærsla hafa áhrif á ferðaþjónustu hér á landi í sumar.

„Maður veltir fyrir sér hvernig það muni þróast inn í sumarið ef það verði opnari leiðir á milli landa á meginlandi Evrópu en hingað til Íslands, hvort þetta verði talin einhvers konar hindrun fyrir ferðalög.“

Mikilvægt að upplýsingarnar séu aðgengilegar

Jóhannes segir fyrirsjáanleika skipta öllu máli í þessu samhengi og að bæði ferðamenn og ferðaþjónustuaðilar geti skipulagt sína starfsemi í kringum aðgerðir yfirvalda. Það séu enn spurningar sem eigi eftir að svara varðandi opnun landamæranna.

„Þar eigum við enn þá því miður töluvert í land þótt það sé núna töluvert um liðið síðan þessi opnun var tilkynnt og símarnir byrjuðu að hringja með allskonar spurningum. Við erum ekki enn komin með samræmd svör sem við getum til dæmis kynnt okkar viðskiptamönnum og ferðaskrifstofum erlendis sem koma hingað með hópa,“ segir Jóhannes Þór og á þar við um upplýsingar um kostnað fyrir ferðamenn vegna skimunar og sóttkví.

„Hvað gerist ef að sá sem situr fyrir framan mig í flugvélinni eða í rútunni eða á flugvellinum er smitaður, þarf ég þá að fara í sóttkví? Hver borgar það? Fæ ég eitthvað endurgreitt? Þetta eru spurningar sem er verið að vinna úr núna og okkur hefur vantað þessa grundvallarþætti þangað til í gær, þannig nú eru menn að hlaupa mjög hratt til þess að gera þetta.“

Hann segist binda vonir við það að allar nauðsynlegar upplýsingar verði samræmdar og gerðar aðgengilegar á einum stað. Þannig geti opinberir aðilar og aðilar í ferðaþjónustu vísað á sömu svör við þeim spurningum sem kynnu að vakna.