Gullfundur Íslendinga á Grænlandi talinn fimmtíu milljarða króna virði

Gullnámur á Grænlandi, sem Íslendingar eiga þriðjung í, hafa reynst mun gullríkari en búist var við. Gullæðar, sem þegar hafa fundist, eru taldar um fimmtíu milljarða króna virði. Þetta kom fram í fréttum Stöðvar 2. 

Gullnámurnar eru á nokkrum stöðum á Suður-Grænlandi, í fjalllendi inn af bænum Nanortalik. Aðalmaðurinn á bak við verkefnið er 33 ára Íslendingur, Eldur Ólafsson frá Torfastöðum í Biskupstungum. 

-Hvernig datt þér í hug að fara að leita að gulli á Grænlandi? 

„Ég held að áhuginn hafi kviknað í jarðfræðinni hérna í Háskóla Íslands. Ég hef fókuserað á auðlindir frá því ég útskrifaðist. Byrjaði í jarðhita, og svo í olíu og gas, og núna í „mining“ á Grænlandi,“ svarar Eldur, stofnandi og framkvæmdastjóri AEX Gold.

Ævintýrið hófst fyrir fimm árum þegar Eldur ásamt fleirum stofnaði fyrirtæki um að taka yfir gullnámu af félagi sem fór í þrot. 

„Og keyptum þessa námu, auk þriggja annarra leyfa, frá þremur mismunandi fyrirtækjum, og settum öll þessi leyfi inn í eitt félag, sem við skráðum á markað í Kanada árið 2017.“

Þeir fengu inn sérfræðiþekkingu og fjármagn til að standa undir meiri leit sem núna hefur skilað þeim árangri að búið er að finna óvenju gullríkar æðar. 

„Sem eru 18 grömm á tonnið. Það er mjög hátt hlutfall. Meðaltalið í heiminum er í kringum 2-3 grömm. Og segir sig sjálft að þegar þú ert með hærra hlutfall þá er ódýrara að vinna það,“ segir Eldur. 

Gullið hefur reynst meira en búist var við, segir í frétt grænlenska miðilsins Sermitsiaq, sem lýsir árangrinum sem gullævintýri.

Gullmagnið, sem áætlað er að finnist í námunum, telst verulegt, sem og verðmætið. 

„263 þúsund únsur. Markaðsverð á gulli í dag er í kringum 1.500 dollarar þannig að þetta eru í kringum 400 milljónir dollara.“ 

Eða um fimmtíu milljarðar íslenskra króna.

Fjárfestar í AEX Gold eru um tvöhundruð talsins en tæplega þriðjungur hlutfjár er í höndum Íslendinga. 

„Ég myndi halda að það væri yfir þrjátíu prósent í félaginu, ef ég ætti að skjóta á það. Stór partur er hlutur minnar fjölskyldu, sem er um tólf prósent í félaginu.“ 

Eldur segir námareksturinn verða með lágmarks umhverfisáhrifum. 

„Það er að segja; allt efni sem við tökum út úr fjallinu skilum við aftur inn í fjallið, eftir að við erum búnir að taka gullið úr því.“

Þá muni gullnáman styrkja fjárhag Grænlands. 

„Við getum búið til störf þarna fyrir 100-200 manns á svæðinu. Við getum skilað auðlindagjöldum upp á 2,5 prósent til stjórnvalda auk skatta og gjalda. Þannig að þetta hefur áhrif á samfélagið,“ segir Eldur.

Hann bætir við að fjárfesting í sjálfbærri orkuvinnslu vegna námarekstursins, eins og vindmyllum og vatnsorkuveri, muni jafnframt gagnast byggðum í grennd.

Og núna er komið að því að hefja gullvinnsluna. 

„Við sendum núna strax út á þessu ári nokkur tonn til þess að slá nokkrar gullmyntir og við sjáum hvað kemur út úr því. En í framhaldinu af því ætlum við að byrja á næsta ári og svo aukum við vinnsluna frá ári til árs. Plönin liggja þannig hjá okkur,“ segir Eldur Ólafsson. 

Hér má sjá frétt Stöðvar 2: