Sí­brota­maður í steininn fyrir líkams­á­rás á Laugar­dals­velli og 23 önnur brot

Ívar Aron Hill Ævarsson var þann 3. desember síðastliðinn dæmdur í Héraðsdómi Reykjaness í 22 mánaða fangelsisvist fyrir margvísleg brot í alls 24 ákæruliðum.

Var Ívar meðal annars ákærður fyrir að hafa slegið einstakling í andlit og höfuð undir stúkunni á Laugardalsvelli svo hann féll til jarðar þann 24. júlí 2018. Þann dag fóru fram tónleikar hljómsveitarinnar Guns N' Roses á Laugardalsvelli.

Sjá einnig: Síbrotamaður dæmdur

Ívari er þá gert að hafa sparkað í líkama hans og höfuð með þeim afleiðingum að brotaþolinn hlaut heilahristing, mar á baki og yfirborðsáverka á höfði.

Einnig var hann ákærður fyrir að hafa ekið ítrekað undir áhrifum slævandi lyfja og ólöglegra vímuefna, vörslu fíkniefna og að hafa tekið bifreiðar ítrekað ófrjálsri hendi.

Flest öll brotin framin árið 2019

Þar að auki var hann ákærður fyrir þjófnað og innbrot inn á heimili, í fyrirtæki og verslanir. Nær öll 24 brotin voru framin árið 2019. Ívar játaði sakargiftir fyrir dómi og var málið því tekið til dóms án frekari sönnunarfærslu.

Ívari var gert að greiða málskostnað brotaþola líkamsárásarinnar og 415 þúsund krónur í miskabætur. Hann var einnig dæmdur til að greiða allan annan sakarkostnað og sviptur ökuréttindum ævilangt.

Á sér langan brotaferil

Fram kemur í dómnum að Ívar eigi að baki umtalsverðan sakaferil sem nái aftur til ársins 2008.

„Ákærði hefur nú í sjötta sinn verið fundinn sekur um akstur undir áhrifum áfengis eða ávana-og fíkniefna. Ákærði hefur nú í fimmta sinn verið fundinn sekur um akstur sviptur ökurétti.“

Þó nokkuð hefur verið fjallað um brot Ívars undanfarin ár og fram hefur komið að hann hafi verið liðsmaður hins svokallaða Árnesgengis. Meðlimir hópsins voru meðal annars dæmdir fyrir fjölda þjófnaða í Árnessýslu sem áttu sér stað árið 2006.

Reyndi að ræna hraðbanka í heilu lagi

Árið 2007 var Ívar á meðal tíu manna hóps sem var samanlagt ákærður í sjötíu ákæruliðum. Var hann þá meðal annars ákærður fyrir að hafa í slagtogi við þrjá aðra reynt að ræna hraðbanka í heilu lagi með því að velta honum upp á pallbíl.

Sjá einnig: Hæstiréttur þyngir dóm yfir síbrotamanni

Er hann sama ár einnig sagður hafa tekið þátt „í ótrúlegri afbrotahrinu sem teygði sig frá höfuðborgarsvæðinu og norður í Eyjafjarðarsveit. Á því ferðalagi bar Ívar Aron meðal annars eld að sumarhúsi sem stórskemmdist, auk þess sem hópurinn náði að flýja úr fangelsinu á Akureyri.“

Ákærður fyrir aðild að vopnuðu ráni

Einnig var Ívar ákærður árið 2011 fyrir aðild að vopnuðu ráni þar sem brotaþoli er sagður hafa verið fluttur nauðugur að heimili sínu.

„Á leiðinni hélt hvor undir sinn handlegg mannsins og beindu öðru hvoru hnífum að síðum hans, að því er segir í ákæru. Þegar kom á heimili mannsins söfnuðu hinir ákærðu ræningjar saman ýmsum verðmætum í eigu hans og höfðu á brott með sér. Fórnarlambið reyndi ekki að hindra mennina af ótta við þá.“