Káfaði á grunn­skóla­stúlku og spurði hvort karl­menn hefðu borgað henni

Karlmaður á fertugsaldri situr í gæsluvarðhaldi grunaður um brot á stúlku yngri en fimmtán ára. Landsréttur hafnaði kröfu lögreglunnar um að karlmaðurinn sætti einangrun á meðan rannsókn málsins stendur. Gæsluvarðhaldið rennur út á morgun.

Karlmaðurinn var handtekinn á laugardaginn á heimili sínu þar sem ungar stúlkur fengu að gista. Stúlkan sagði við skýrslutöku hjá lögreglu að karlmaðurinn hefði káfað á henni endurtekið undir teppi þar sem hún hefði legið sofandi í sófanum. Hún hefði verið mjög hrædd og liðið illa.

Atburðarásin er rakin að einhverju leyti í gæsluvarðhaldsúrskurði Héraðsdóms Reykjavíkur. Svo virðist sem karlmaðurinn hafi boðið tveimur ungum stúlkum gistingu á heimili sínu sem af lýsingum virðist hafa verið dópgreni.

Blóðdropar og sprautunálar

Þannig hafi fundist notaðar sprautur og nálar ásamt leifum af ætluðum fíkniefnum á víð og dreif um íbúðina. Meðal annars hafi fundist notuð sprautunál í sófa þar sem stúlkurnar sváfu. Þá voru tveir hnífar á stofuborði auk þess sem haglabyssa fannst í fataskáp. Íbúðin var mjög ósnyrtileg og fundust blóðdropar á gólfi, veggjum, sófa og baðherbergi við vettvangsrannsókn tæknideildar lögreglu.

Stúlkan lýsir því að hún hafi vaknað við það að karlmaðurinn settist hjá henni í sófanum og spurði hana hvort karlmenn hefðu einhvern tímann borgað henni. Hún sagðist ekki hafa skilið spurningu mannsins almennilega og farið aftur að sofa.

Skömmu síðar hafi hún vaknað aftur við að maðurinn var að káfa á henni undir teppinu. Hafi hann strokið á henni fæturna, lærin og rassinn og hefði hlegið inn á milli. Hann hafi svo staðið upp og komið aftur og haldið áfram að strjúka á henni rassinn og lærin. Stúlkan kvaðst hafa þóst vera sofandi og sagt að þetta hefði staðið yfir í um það bil 20 mínútur.

Hringdu eftir aðstoð

Stúlkan sagði að hún hefði verið mjög hrædd og liðið illa á meðan á þessu hafi staðið. Þegar maðurinn hafi staðið aftur á fætur hafi hún vakið aðra stúlku sem hafi sofið á móti henni í sófanum. Hún kvaðst þó ekki hafa viljað segja henni hvað gerst hefði en náð að hringja í eftir aðstoð sem hefði borist skömmu síðar.

Stúlkan lýsti því að þegar karlmaðurinn sá að væri að fara þá hafi hann beðist innilega afsökunar á því sem hann hefði gert.

Karlmaðurinn var handtekinn þegar hann var að yfirgefa íbúðina. Að sögn lögreglu var hann sjáanlega í annarlegu ástandi, sjáöldur hans útþanin og hann talað samhengislaust. Aðspurður kvaðst hann ekki vita hvað hefði gengið á en sagðist hafa verið sofandi í sófanum.

Í greinargerð lögreglunnar á höfuðborgarsvæðinu kemur fram að rannsókn málsins sé á frumstigi. Fram undan séu skýrslur af vitnum á vettvangi sem teknar yrðu í Barnahúsi. Auk þess eigi eftir að rannsaka frekar sönnunargögn sem hald hafi verið lagt á. Lögreglustjóri telji til staðar hættu á að karlmaðurinn reyni að torvelda rannsókn málsins svo sem með því að afmá merki eftir brot, skjóta munum undan eða hafa áhrif á samseka eða vitni.

Einangrun hafnað

Karlmaðurinn sé undir rökstuddum grun um að hafa brotið gegn stúlkunni. Um sé að ræða brot á 1. og 2. málsgrein 202. greinar almennra hegningarlaga þar sem segir:

1. málsgrein: Hver sem hefur samræði eða önnur kynferðismök við barn, yngra en 15 ára skal sæta fangelsi ekki skemur en 1 ár og allt að 16 árum

2. málsgrein: Önnur kynferðisleg áreitni en sú sem greinir í 1. mgr. varðar fangelsi allt að 6 árum

Var farið fram á gæsluvarðhald og einangrun sem Héraðsdómur Reykjavíkur sættist á til að koma í veg fyrir að karlmaðurinn gæti skemmt fyrir rannsókninni. Landsréttur féllst á gæsluvarðhald en taldi lögreglu ekki hafa sýnt fram á nauðsyn þess að karlmaðurinn sætti einangrun.

Úrskurð Landsréttar má lesa hér.