Segja Sigmund byggja mál sitt á þekktum loftslagssvindlurum

Náttúruverndarsamtök Íslands telja tilefni til að leiðrétta fullyrðingar formanns Miðflokksins um loftslagsmál, sem Sigmundur Davíð Gunnlaugsson vakti máls á í ræðu sinni við stefnuræðu forsætisráðherra í gærkvöld. Samtökin segja Sigmund meðal annars hafa vísað í máli sínu til „þekktra svindlara“ og hvetja aðra þingmenn til að varast sambærilegan málflutning.

Sigmundur var einn þriggja ræðumanna Miðflokksins í gærkvöld, þegar Katrín Jakobsdóttir flutti stefnuræðu sína fyrir komandi þingvetur. Mörgum þingmönnum varð tíðrætt um loftslags- og umhverfismál, til að mynda voru þau fyrirferðamikil í ræðu forsætisráðherra.

Sigmundur Davíð vék einnig að málaflokknum í sinni ræðu og sagði meðal annars að loftslagsbreytingar „væru vissulega stórt og mikilvægt mál en þau [eigi] það sameiginlegt með öðrum þeim málum sem vekja mesta athygli að þeir sem tala mest um þau nálgast þau oft á kolrangan hátt.”

Sjá einnig: Litlar efasemdir um loftslagsbreytingar

Í ræðu sinni sagðist Sigmundur meðal annars byggja afstöðu sína á viðvörunum Alþjóða veðurfræðistofnunarinnar, sem á að hafa varað við „ofstæki í loftslagsmálum,“ eins og formaður Miðflokksins komst að orði.

Náttúruverndarsamtök Íslands telja þó ekki mikið til þessarar stofnunar koma. Umrædd stofnun, Global Warming Policy Forum (GWPF), sé bresk samtök sem afneita vísindalegum niðurstöðum um loftslagsbreytingar. „Um þekkta svindlara er að ræða,“ segja Náttúruverndarsamtök Íslands í yfirlýsingu sem þau sendu fjölmiðlum í dag. 

„GWFP er alls óskyld Veðurfræðistofnun Sameinuðu þjóðanna, WMO, en GWFP flaggar gjarnan lógó-i WMO og höfuðpaurinn titlar sig sem WMO Secretary General. Öruggt er að WMO hefur ekki varað við „ofstæki í loftslagsmálum.”

Ræða Sigmundar hefur ekki síst vakið athygli fyrir efasemdir sem þar heyrðust um að fellibyljir væru orðnir tíðari og öflugri en áður. „Munurinn liggur í því að nú er mun meiri byggð en áður á þeim svæðum þar sem fellibyljir eru algengastir og tjónið því meira,“ sagði Sigmundur.

Náttúruverndarsamtök Íslands segja þessar fullyrðingar á sandi byggðar og vísa í nýlega fréttatilkynningu WMO. Hún taki af allan vafa um að landsvæði nærri sjó séu viðkvæm fyrir afleiðingum fellibylja, „sem loftslagsbreytingar hafa ýtt undir.“ Aukinheldur segir í sömu tilkynningu að líkurnar á öflugum fellibyljum, af stærðum 4 og 5, muni að öllum líkindum aukast vegna loftslagsbreytinga.

„Nýverið kom fram að litlar efasemdir eru meðal landsmanna um loftslagsbreytingar. Svo hefur verið í mörg ár. Þetta veit Sigmundur Davíð mæta vel og í stað þess að andæfa vísindunum beint vitnar hann í þekkta svindlara og hefur sig upp með innihaldslausu tali um nauðsyn þess „að beita vísindum og skynsemi.” Náttúruverndarsamtök Íslands vona innilega að þingmenn varist slíkan málflutning í umræðum um loftslagsvána, neyðarástand sem alþjóðasamfélagið stendur frammi fyrir,“ segir í yfirlýsingu samtakanna.

Uppfært kl. 16:30:

Misskilnings virðist gæta hjá bæði Náttúruverndarsamtökum Íslands sem og Sigmundi. Nánar hér: Stjóri veðurstofnunar sem Sigmundur vitnaði í segir orð sín afbökuð