Ísland og hin EFTA-ríkin semja við Mercosur

Fríverslunarsamtök Evrópu, sem Ísland er aðili að ásamt Noregi, Sviss og Liechtenstein, hefur náð samningi við Mercosurríkin Argentínu, Brasilíu, Úrúgvæ og Paragvæ um fríverslun milli ríkjanna.

Með samningnum lækka tollar á vörur sem flutt er út frá Íslandi. Sjávarafurðir munu njóta tollfrelsis, sumar um leið og samningurinn tekur gildi en aðrar að loknum aðlögunartímum.

Guðlaugur Þór Þórðarson, utanríkisráðherra, segir að ánægjulegt sé að samningurinn sé í höfn.

„Við höfum lagt mikla áherslu á að ljúka samningaviðræðum við Mercosur-ríkin og það er ánægjulegt að sá samningur sé nú í höfn. Markaðsaðgangur fyrir sjávarafurðir er sérstaklega mikilvægur fyrir okkur og hann eykst umtalsvert með þessum samningi,“ sagði Guðlaugur Þór. „Ég tel að við getum verið mjög sátt við þennan samning, sérstaklega þar sem hann er ekki síðri en sá sem Mercosur hefur nýlega samið um við Evrópusambandið."

Árið 2018 nam útflutningur frá Íslandi til Mercosur ríkjanna um 1,5 milljarði króna og í hina áttina nam flutningur um 24 milljörðum. Vegur þar þyngst áloxíð sem þó er nú þegar tollfrjálst.