Ragn­heiður tekur við af Páli hjá Keahótelum

Þetta kemur fram í tilkynningu. Þar segir að Ragnheiður taki við starfinu 1. nóvember 2026. Hún hefur verið framkvæmdastjóri sölu- og markaðssviðs hjá félaginu frá árinu 2022.

„Páll L. Sigurjónsson, einn af stofnendum Keahótela og forstjóri þess frá upphafi, tekur við sem stjórnarformaður af Jonathan B. Rubini, einum af eigendum félagsins.

Keahótel ehf. var stofnað árið 2000 og hóf þá rekstur Hótels Kea á Akureyri. Undir stjórn Páls hefur félagið vaxið í eina af stærstu hótelkeðjum landsins. Keahótelin eru nú samtals tíu og eru sex þeirra í Reykjavík og fjögur á landsbyggðinni. Hjá félaginu starfa um 350 manns,“ segir í tilkynningunni.

Haft er eftir Jonathan B. Rubini, fráfarandi stjórnarformanni, að hann vilji þakka Páli fyrir frábært starf og þá miklu uppbyggingu sem hann hafi leitt hjá Keahótelum undanfarinn rúman aldarfjórðung.

„Undir hans stjórn hefur félagið vaxið úr rekstri eins hótels í öfluga hótelkeðju með starfsemi víða um land. Hann hefur byggt upp traustan grunn fyrir áframhaldandi vöxt. Það er mikill styrkur fyrir félagið að njóta áfram reynslu hans og þekkingar í hlutverki stjórnarformanns,“ segir Jonathan.

Viðtæk reynsla

Um Ragnheiði segir að hún hafi víðtæka stjórnunarreynslu á sviði sölu, þjónustu, markaðsmála og tækni.

„Hún hóf störf hjá Vodafone árið 2004 og starfaði þar í fimmtán ár, síðast sem framkvæmdastjóri einstaklingssviðs. Síðar var hún framkvæmdastjóri stafrænnar þróunar og upplýsingatækni hjá Isavia.

Hjá Keahótelum hefur Ragnheiður borið ábyrgð á sölu, markaðsmálum, tekjustýringu og innleiðingu nýrra tæknilausna. Hún er með B.S.-gráðu í viðskiptafræði frá Háskóla Íslands og situr í stjórn Samtaka ferðaþjónustunnar,“ segir í tilkynningunni.

Réttur tími

Páll segir að eftir 36 ár sem stjórnandi í ferðaþjónustu, hótel- og veitingarekstri finnist sér réttur tími til að skipta um gír. Ánægjulegt sé að Ragnheiður taki nú við keflinu.

„Hún hefur gegnt lykilhlutverki í sölu- og markaðsmálum Keahótela og þekkir félagið og starfsemina vel. Ragnheiður hefur sterka sýn á sölu og þjónustu, auk tækniþekkingar sem nýtist vel við áframhaldandi þróun rekstrarins. Hún hefur jafnframt sýnt góða leiðtogahæfileika og ég er sannfærður um að hún muni leiða félagið af krafti áfram með okkar öfluga starfsfólki. Það er ánægjulegt að fela henni framkvæmdastjórnina og ég hlakka til áframhaldandi samstarfs í nýju hlutverki,“ segir Páll.

Þá er haft eftir Ragnheiði að Páll hafi byggt upp sterkt félag og segist hún taka við góðu búi. „Ég hlakka til að takast á við nýtt hlutverk með öflugum hópi fólks sem býr yfir mikilli þekkingu og metnaði. Félagið stendur á traustum grunni og ég sé spennandi tækifæri til áframhaldandi vaxtar,“ segir Ragnheiður.

Keahótel reka tíu hótel víðsvegar um landið. Í Reykjavík eru þau Hótel Borg, Apótek Hótel, Sand Hótel, Hótel Skuggi, Storm Hótel og Reykjavík Lights Hótel. Utan höfuðborgarinnar rekur félagið Hótel Kea á Akureyri, Sigló Hótel á Siglufirði, Hótel Kötlu við Vík og Hótel Grímsborgir í Grímsnesi.