Höttur og Huginn tefla fram sameinuðu liði í 3. deild

Austfjarðarliðin Huginn frá Seyðisfirði og Höttur frá Egilsstöðum munu tefla fram sameinuðu liði í 3. deild næsta sumar.



Bæði lið léku í 2. deildinni síðasta sumar en féllu úr deildinni.



Í kjölfar þess var farið í viðræður, og er það niðurstaða þeirra að tefla fram sameinuðu liði í 3. deildinni.



„Þetta er niðurstaða eftir um tveggja mánaða viðræður á milli félaganna. Stjórnir beggja félaga eru sannfærðar um að þetta sé rökrétt skref og að þarna sé verið að tryggja það að hægt sé að efla alla umgjörð í kringum knattspyrnuna,“ segir í tilkynningu frá félögunum.



Með þessu losnar eitt sæti í 3. deildinni. Óljóst er hvort að Ægir, sem féll úr 3. deild eða Álftanes, sem lenti í 4. sæti í 4. deildinni munu fá lausa sætið. Verið er að fjölga liðunum í deildinni úr tíu í tólf og er því óljóst hvort liðið fær lausa sætið næsta sumar.